Lajme

“Bojkoti duhet të jetë shqetësim shumë i madh për Qeverinë”, Haziri për numrin e vogël të votuesve në Veri


Nënkryetari i Lidhjes Demokratike të Kosovës, Lutfi Haziri, ka thënë se mos dalja e qytetarëve serbë në votimin për shkarkimin e katër kryetarëve shqiptarë në Mitrovicë të Veriut, Leposaviq, Zveçan dhe Zubin Potok, duhet të jetë shqetësim i madh për Qeverinë e Kosovës.

“Mos dalja apo bojkoti duhet të jetë shqetësim shumë i madh për Qeverinë dhe Republikën. Ky është ‘shkarkim plebishitar’ i kryetarëve legalë, por pa legjitimitet. Lojaliteti ndaj ftesës së presidentit serb për bojkot nuk u përfill nga 85 + qytetarë”, ka shkruar Haziri në Facebook.

“Ku mbeti de-eskalimi, përfundimi i bojkotit apo edhe dialogu me serbët e Kosovës në vend të dialogut me Serbi?”, ka pyetur Haziri.

Në votimin për shkarkimin e katër kryetarëve shqiptarë në Mitrovicë të Veriut, Leposaviq, Zveçan dhe Zubin Potok, deri në orën 11:00, sipas kryetarit të Komisionit Qendror të Zgjedhjeve, Kreshnik Radoniqit, kanë votuar vetëm 85 persona.

“Qendrat janë të hapura dhe vazhdojnë të presin qytetarët me të drejtë vote. Sipas të dhënave që kemi pranuar nga komisionet komunale të zgjedhjeve në këto katër komuna, numri i qytetarëve që kanë votuar deri në orën 11:00 është si në vijim. Në Leposaviq 46 votues, në Zubin Potok shtatë votues, në Zveçan asnjë votues dhe në Mitrovicë të Veriut 32 votues”, tha Radoniqi në një konferencë për media.

“I ftojmë të gjithë qytetarët që shfrytëzojnë të drejtën e tyre për të marrë pjesë në procesin e votimit dhe deklarohen nëse janë për ose kundër largimit nga funksioni i kryetarëve”, shtoi.

Në katër komunat veriore, të drejtë vote kanë 46.556 persona, apo 1.461 votues më shumë krahasuar me zgjedhjet lokale të mbajtura më 23 prill 2023, kur u zgjodhën kryetarët shqiptarë.

Ndryshe, kryetarët shqiptarë u zgjodhën në prill të vitit 2023 në zgjedhjet të cilat u bojkotuan nga serbët në shenjë pakënaqësie me politikat e Qeverisë së Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore