Kosova

Blinkeni dënon ashpër “sulmet e koordinuara” ndaj Policisë së Kosovës


Anotny Blinken

Sekretari i Departamentit amerikan të Shtetit (DASH), Antony Blinken, nëpërmjet deklarate të lëshuar për media të hënën pasdite, dënoi ashpër “sulmin e koordinuar” në hyrje të fshatit Banjskë të Zveçanit – komunë e banuar me shumicë serbe – ku një grup i armatosur qëlloi me armë zjarri mbi trupat e Policisë së Kosovës, duke shuar jetën e një zyrtari policor.

“Shtetet e Bashkuara të Amerikës dënojnë ashpër sulmet e koordinuara dhe të dhunshme ndaj Policisë së Kosovës pranë Manastirit të Banjskës më 24 shtator dhe shprehin ngushëllime të thella për familjen e rreshterit të Policisë së Kosovës të vrarë në krye të detyrës. Autorët e këtij krimi duhet të mbajnë përgjegjësi nëpërmjet një procesi hetimor transparent”.

Blinkeni bëri thirrje që Kosova dhe Serbia të përmbahen nga, siç tha ai, çdo veprim apo retorikë që mund të nxisë tensionet dhe të punojnë menjëherë në koordinim me partnerët ndërkombëtarë për të de-përshkallëzuar situatën, për të garantuar sigurinë dhe sundimin e ligjit dhe për t’u kthyer në dialogun për normalizimin e marrëdhënieve nën kujedsin e Bashkimit Evropian (BE).

“Policia e Kosovës ka përgjegjësi të plotë për zbatimin e sundimit të ligjit në Republikën e Kosovës. Shtetet e Bashkuara të Amerikës e njohin dhe respektojnë rolin e Policisë së Kosovës si reaguese e parë në situata emergjente dhe situata krize”, nënvizoi shefi i diplomacisë amerikane.

Ai vlerësoi gjithashtu edhe “koordinimin e ngushtë” të Policisë së Kosovës me Misionin e BE-së për Sundimin e Ligjit (EULEX) dhe Misionin Paqeruajtës të NATO-s në Kosovë (KFOR), derisa shtoi se do të vazhdojnë të monitorojnë situatën dhe të koordinohen me aktorët e përfshirë në terren.

Gjithçka filloi në orët e para të mëngjesit të 24 shtatorit, kur një grup i armatosur rëndë në hyrje të fshatit Banjskë në veriun e territorit të banuar kryesisht me serbë etnikë, qëlluan me armë zjarri mbi trupat e Policisë së Kosovës, duke shuar jetën e një zyrtari policor dhe plagosur dy të tjerë.

Grupi që ngriti në nivele të larta shkallën e egërsisë në veri, sipas autoriteteve kosovare, nuk ka qenë në përbërje të civilëve të rëndomtë që ngrenë krye herë pas here në këtë zonë, por ka ngërthyer brenda vetes së paku 30 pjesëtarë të trajnuar, ushtarakë e paramilitarë, të cilët janë sponsorizuar nga shteti serb.

Pjesëtarët e këtij grupi, pas vrasjes së policit kosovar në krye të detyrës dhe plagosjes së dy policëve të tjerë, gjetën strehë në Manastirin e Banjskës, ku u barrikaduan për orë të tëra dhe shkëmbyen të shtëna me organet e rendit gjatë gjithë ditës së dielë, duke tentuar të provokonin kryengritje më të gjërë.

Kjo bandë që cenoi sigurinë dhe paqen në veriun e trazuar të vendit, u neutralizua nga Policia e Kosovës dhe operacioni policor gëzoi mbësheje të gjërë ndërkombëtare. Katër pjesëtarë të bandës terroriste u vranë, dy të tjerë u plagosën dhe gjashtë u arrestuan, ndërsa të tjerët u arratisën në Serbi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore