Bislimi për raportin e BERZH: Rezultatet nuk janë rastësi, trajektorja në të cilën e kemi drejtuar vendin është e duhur

Sipas zëvendëskryeministrit të Kosovës, Besnik Bislimi nuk është rastësi që Banka Evropiane për Rindërtim dhe Zhvillim (BERZH), e ka gjetur Kosovën si vendin me rritjen ekonomike më të lartë në rajon.

Zëvendëskryeministri përmes një cicërime në rrjetin social ‘Twitter’, për këtë rritje ia la meritat Qeverisë, teksa ka theksuar se synim vazhdojnë ta kenë barazinë mes qytetarëve.

“Këto rezultate nuk janë rastësi. Trajektorja në të cilën e kemi drejtuar vendin është ajo e duhura, ku do të shohim përfitimet në vitet në vijim. Qëllimi ynë është që kjo rritje të jetë e qëndrueshme. Të zvogëlohen pabarazitë dhe të ketë shpërndarje të barabartë për të gjithë qytetarët”, ka shkruar Bislimi në Twitter.

These results are not casual. The trajectory in which we have directed the country is the right one, where we will see the benefits in the coming years. Our goal is for this growth to be sustainable. To reduce inequalities and have equal distribution for all citizens.

— Besnik Bislimi (@BislimiBesnik) May 18, 2023

Bislimi, ka thënë se BERZH parashikon që ky trend do të vazhdojë edhe në të ardhmen e afërt.

“Së fundmi, BERZH e gjeti Kosovën si vendin me rritjen ekonomike më të lartë në rajon për vitin 2023. Ajo parashikon që ky trend të vazhdojë edhe në të ardhmen e afërt”.

“Banka Botërore dhe FMN e kanë vlerësuar gjithashtu vendin tonë për rritjen ekonomike dhe trendin pozitiv”, shtoi ai.

Më 6 prill, Banka Botërore kishte bërë të ditur se rritja ekonomike në Kosovë për vitin 2022 ka qenë 3.5 për qind, ndërsa për vitin 2023 do të ketë një rritje modeste me 3.7 për qind.

Mirëpo, në Kosovë, gjatë vitit 2022, janë shtrenjtuar dukshëm edhe çmimet e produkteve bazë.

Sipas të dhënave të Agjencisë së Statistikave të Kosovës, rritja ka filluar nga muaji prill me 1.2 për qind, duke arritur në 5.7 për qind në muajin tetor.

Rritja më e lartë e çmimeve është vërejtur te buka, drithërat, mishi, qumështi, djathi, vaji, vezët, pemët dhe perimet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.