Bislimi në takim me zyrtarin evropian për siguri: Grafitet nacionaliste nga ekstremistët serbë të dënohen ashpër

Zëvendëskryeministri i Kosovës, Besnik Bislimi, të martën ka pritur në takim Zëvendës Sekretarin e përgjithshëm për Paqe, Siguri dhe Mbrojtje të Bashkimit Evropian, Charles Fries, me të cilin, sipas njoftimit të Zyrës së Kryeministrit, bisedoi për situatën në pjesën veriore të Kosovës.

Bislimi ka thënë se pret nga komuniteti ndërkombëtar që të dënojë ashpër grafitet nacionaliste të vizatuara në automjetet e veturave në veri të vendit – kryqi me katër shkronja cirilike “S (С)”, që nënkupton “Vetëm uniteti i shpëton serbët” – dhe Z-ja e agresionit rus në Ukrainë.

“Grafitet nacionaliste dhe pro-Kremlinit nga ekstremistë të maskuar e grupe kriminale, janë po ashtu tregues kryesorë të motiveve prapa veprimeve të dhunshme, të cilat duhet të dënohen ashpër nga të gjithë”, theksoi Bislimi.

Gjithashtu, siç tregon njoftimi, palët diskutuan mbi zhvillimet e fundit në veri të vendit, ku zëvendëskryeministri dënoi dhunën e përdorur ndaj KFOR-it, Policisë së Kosovës dhe gazetarëve, duke shtuar se protesta është keqpërdorur nga bandat kriminale të dirigjuara nga Beogradi për qëllimet dhe motivet e tyre kriminale.

Fries nga ana tjetër, sipas njoftimit, shprehu vlerësimin për qëndrimin e Kosovës ndaj agresionit të pajustifikuar rus në Ukrainë dhe progresin që ka njohur vendi viteve të fundit, sidomos në agjendën evropiane.

Në këtë takim zëvendëskryeministri Bislimi shoqërohej nga Ministri i Punëve të Brendshme, Xhelal Sveçla, ndërsa zëvendës sekretari Fries nga shefi i Zyrës së BE-së në Kosovë, Tomas Szunyog dhe shefi i EULEX-it, Lars-Gunnar Wigemark.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.