Biserko: Serbia “Kali i Trojës” i Rusisë dhe i Kinës në Evropë

Kryetarja e Komitetit të Helsinkit për të Drejtat e Njeriut në Serbi, Sonja Biserko, ndërsa ka komentuar vizitën dyditore të presidentit të Kinës në Serbi, Xi Jinping, ka potencuar se kjo është dëshmia më e mirë se Serbia nuk po tregon vullnet politik për të iniciuar reforma të cilat do të krijonin një shoqëria demokratike dhe as dëshirë reale për t’u bërë pjesë e Bashkimit Evropian.

Me këtë vizitë, sipas Biserkos, është bërë e qartë se Serbia është më se e gatshme të shërbejë si “Kalë i Trojës” për Rusinë dhe Kinën në Evropë.

“Vizita e Xi është mesazhi më tregues për Perëndimin aq më tepër që vizita pasoi menjëherë pas shënimit të 25-vjetorit të ndërhyrjes së NATO-s, gjatë së cilës u godit edhe ambasada kineze, për të cilën amerikanët kërkuan falje dhe pranuan se ishte një gabim”, ka thënë ajo në një intervistë për gazetën serbe, Danas.

Në vlerësimin e saj presidenti i Serbisë, Aleksanëdr Vuçiç, ka vendosur Serbinë në pozitën e një partneri servil, i cili pret që Kina të mbështesë aspiratat hegjemoniste të Serbisë.

“Si Rusia, ashtu edhe Kina dhe Serbia janë vende revizioniste që nuk pranojnë rendin aktual, veçanërisht kufijtë e vendosur pas Luftës së Dytë Botërore. Prandaj kjo vizitë dërgoi një mesazh negativ për të gjithë rajonin”, ka shtuar ajo.

I deleguari i Shteteve të Bashkuara të Amerikës për Ballkanin Perëndimor, Gabriel Esocbar, në një konferencë për media tha se vizita dyditore e presidentit të Kinës, Xi Jinping në Serbi po ndodhë në kohën e “duhur për të rritur tensionet në mes të Serbisë dhe pjesës tjetër të komunitetit perëndimor”.

“Besoj se koha e vizitës është zgjedhur me qëllim”, tha Escobar, meqë në vlerësimin e tij vizita e presidentit kinez përkon me përvjetorin e bombardimit të NATO-s ndaj ambasadës kineze në Beograd.

“Shtetet e Bashkuara njoftuan se bombardimi i ambasadës kineze në vitin 1999 ishte aksidental. Ne kërkuam falje. Besoj se kemi paguar edhe dëmshpërblime për familjet”, ka shtuar ai.

Presidenti i Serbisë, Aleksandër Vuçiç, ndërsa priti presidentin kinez, Xi Jinping, të mërkurën në Beograd, shprehu mbështetje të fortë ndaj pretendimeve të Kinës mbi Tajvanin gjatë një fjalimi të mbajtur para turmës së mbledhur jashtë Pallatit të Serbisë për nder të presidentit kinez.

“Ne kemi një qëndrim të qartë dhe të thjeshtë mbi integritetin territorial kinez. Po, Tajvani është Kinë”, deklaroi presidenti serb, duke tërhequr paralele ndërmjet Kosovës dhe Tajvanit, ndonëse Serbia pretendon ta ketë synim strategjik anëtarësimin në Bashkimin Evropian (BE).

Presidenti i Kinës mbërriti në Serbi mbrëmjen e 7 majit për një vizitë dyditore, në përpjekje për ta përforcuar “miqësinë e çeliktë” ndërmjet dy vendeve. Vizita e presidentit kinez vjen në 25-vjetorin e sulmeve ajrore të NATO-s në Serbi, gjatë të cilave u godit edhe ambasada kineze.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.