Biserko: Për dhunën në Veri kanë faj edhe ndërkombëtarët

Sonja Biserko, kryetare e Komitetit të Helsinkit për të Drejtat e Njeriut në Serbi, ka thënë se për situatën e krijuar në Veri të Kosovës edhe bashkësia ndërkombëtare është fajtore – ku protestuesit e dhunshëm serbë sulmuan ushtarët e KFOR-it – pasi që, siç thotë ajo ndërkombëtarët ishin pro zgjedhjeve të 23 prillit, përkundër se serbët i kishin bojkotuar.

“Për sjelljet e dhunshme në veri të Kosovës është përgjegjës edhe bashkësia ndërkombëtare. Para së gjithash, sepse ajo i njohu zgjedhjet në veri, vetëm për t’i kontestuar kur u vendosën kryetarët e rinj”, ka thënë Biserko në një intervistë për median opozitare serbe “Danas”.

Ajo mendon se thelbi i problemit është se gjatë gjithë këtyre viteve, “që nga viti 2013, zbatimi i marrëveshjeve të dakorduara në mes të Kosovës dhe Serbisë vazhdimisht është vonuar”.

“Dialogu në këtë mënyrë vetëm vonon zbatimin e asaj që është pranuar me marrëveshjet e Brukselit dhe Ohrit. Konflikti me KFOR-in është një përpjekje për të diskredituar NATO-n, të cilën Perëndimi nuk do ta lejojë”, beson ajo.

Ndërkaq, Biserko vlerëson se ka ardhur momenti, që Bashkimi Evropian dhe Shtetet e Bashkuara të Amerikës të zbatojnë përfundimisht zgjidhjet e arritura në dialog, “të forcojnë KFOR-in dhe në këtë mënyrë të parandalojnë përshkallëzimin e mëtejshëm të situatës në Veri të Kosovës”.

“Të ulin tensionet dhe t’i japin fund çështjes së Kosovës, gjë që duhej të ishte bërë shumë kohë më parë”, pohoi ajo.

Në të gjithë këtë situatë të krijuar, Biserko beson që “çmimin më të madh e paguajnë serbët e Kosovës në Veri sepse janë të manipuluar nga Beogradi”, duke shtuar se “ai e zbaton politikën e tij të shantazhit përmes anëtarëve të maskuar të grupeve të ndryshme të djathta”.

“Është e nevojshme që menjëherë t’i hapet rruga Kosovës dhe Serbisë, pra gjithë Ballkanit Perëndimor, për anëtarësim në BE dhe NATO”, mendon ajo.

Ndyshe, që nga 26 maji janë rritur tensionet në Veri të Kosovës. Serbët lokalë po kundërshtojnë kryetarët e rinj shqiptarë të Zveçanit, Leposaviqit dhe Zubin Potokut.

Përveç ndalimit të hyrjes në objektet komunale të kryetarëve të rinj, serbët lokalë po kërkojnë edhe tërheqjen e njësive speciale të Policisë së Kosovës nga kjo pjesë e vendit.

Ndërsa më 29 maj, në Zveçan, strukturat paralele serbe u përleshën me trupat e misionit të NATO-s në Kosovë, KFOR-in, i cili ka shtuar prezencën në veri, pas tensionimit të situatës. Si pasojë 41 pjesëtarë të këtij misioni mbetën të lënduar.

Sekretari i Përgjithshëm i NATO-s, Jens Stoltenberg, deklaroi se Aleanca ka vendosur të dislokojë 700 trupa të tjera nga Forca Operacionale për Ballkanin Perëndimor në Kosovë dhe ka vendosur gjithashtu një batalion shtesë të forcave të NATO-s në gatishmëri të lartë.

“Ne dënojmë fuqishëm sulmet e paprovokuara kundër trupave të KFOR-it në veri të Kosovës, të cilat çuan në plagosjen e 30 paqeruajtësve. Sulme të tilla janë të papranueshme dhe duhet të ndalen”, u shpreh fillimisht ish-kryeministri norvegjez.

Stoltenberg garantoi se KFOR-i – forcat e NATO-s – do të ndërmarrin të gjitha veprimet e nevojshme për të ruajtur një mjedis të sigurt dhe të qetë për të gjithë qytetarët në Kosovë dhe do të vazhdojnë të veprojnë në mënyrë të paanshme në përputhje me mandatin e OKB-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.