![](https://albanianpost.com/wp-content/uploads/2023/04/ghmnjhgmjhfy.jpg)
Enkelejd Alibeaj, kryetari i komanduar i Partisë Demokratike, ka prezantuar kandidaten për Bashkinë Fier, Eriselda Zotaj Çelaj.
Ai, gjatë fjalës së tij, hodhi akuza ndaj ish-kryeministrit Sali Berisha, duke thënë se ka zgjedhur që hallin e tij personal ta bëjë problem të PD-së, referuar shpalljes non-grata nga SHBA-të.
Po ashtu ka shtuar se ai kërkon që ta kthejë PD-në një bunkier anti-amerikan.
“Jam njohur me planin ambicioz të kandidates sonë për Bashkinë e Fierit dhe kam mbetur i mrekulluar nga vizioni i saj. Por ne e dimë që kjo betejë nuk do të jetë e lehtë. Sepse PD-ja e të gjithëve ne, PD-ja që drejtoj, gjendet, prej një viti e gjysmë, nën një sulm të pareshtur”, ka thënë ai.
Sipas Alibeajt, partia po goditet nga ish-lideri i saj historik, nga Berisha.
“Të gjithë e dimë hallin personal të tij, shpalljen non grata për inkurajim të korrupsionit madhor dhe minim të demokracisë nga aleati ynë më i madh perëndimor, SHBA-të”, ka vijuar ai.
Berisha, referuar Alibeajt, zgjodhi që hallin e tij personal ta bëjë problem të PD-së dhe t’ja faturojë demokratëve.
“Por nuk u mjaftua me kaq. Ai erdhi në 8 janar dhe sulmoi fizikisht selinë e PD-së duke dhënë shembullin e një barbarie të pashoqe për jetën publike kombëtare dhe ndërkombëtare. Në 6 mars të vitit të kaluar në një koordinim perfekt me trekëndëshin, në zgjedhje krejt të sajuara, mori demokratë dhe i çoi nëpër sigla të tjera socialiste, duke goditur shanset e demokratëve për të fituar këto zgjedhje”.
Me qëllim që demokratët të shkonin drejt një procesi dhe të ndalej kjo përçarje dhe dhunë e brendshme verbale ose fizike herë pas here – vijon Alibeaj – Berisha vazhdoi veprimet e tij të njëanshme.
“Ai bëri kongres të njëanshëm në 30 prill, bëri zgjedhje të njëanshme duke u zgjedhur kryetar i PD-së dhe duke përmbysur çdo rregull apo logjikë politike”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com