Berisha i kërkon Alibeajt dorëheqjen si kryetar i Grupit Parlamentar

Drejtuesi i Komanduar i Partisë Demokratike, Enkelejd Alibeaj, të martën e 12 prillit ka thirrur mbledhjen e Grupit Parlamentar të Partisë.

Ndonëse ish-kryeministri Sali Berisha nuk është më pjesë e këtij grupi, ai ka qenë prezent në takim.

Madje, ai ka kërkuar dorëheqjen e Enkelejd Alibeajt nga posti i kryetarit të Grupit Parlamentar të PD-së.

E menjëhershme ka qenë kundërpërgjigja e Alibeajt, i cili i ka thënë Berishës se ky i fundit ka pushtuar selinë blu dhe se vendimi i Gjykatës për Kuvendin e Komisionit të Rithemelimit ishte një “farsë”.

Për Berishën, Alibeaj punon “kundër PD-së”.

“Ti punon për Bashën dhe Ramën”, i është drejtuar Berisha kreut të Grupit Parlamentar.

“Përbashkimi i PD-së ka pasur vështirësi, por ekziston një vullnet i gjerë si në bazë të deputetëve për të zhbërë një periudhe të shkurtër përçarje. Duheshin bërë hapa në këtë drejtim. Por një njeri dha dorëheqjen, iku, dhe pasoi një zinxhir ngjarjesh”, ka deklaruar Berisha.

Sipas tij, Alibeaj pa asnjë tagër ka paditur PD-në në gjykatë.

Pas vendimit të Gjykatës së Tiranës për të regjistruar statutin e Berishës, komisioni i Rithemelimit ka marrë drejtimin e selisë blu.

Po ashtu Alibeaj e ka ankimuar këtë vendim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.