Sa diabolike mund të jetë ego-ja për sukses?
Diferencat sociale, ambicia, epshi, fuqia e parasë, dashuria dhe zhgënjimi janë elementët që e bëjnë këtë kryevepër të Mopasan-it ende aktuale sot.
Te “Bel Ami” trajtohen çështje shoqërore, një përzierje e politikës, gazetarisë, parave dhe moralit të thyer mes lakmisë dhe karrierizmit.
Mbi librin
Romani “Bel Ami” u publikua për herë të parë më 1885. Ai rrëfen historinë e Georges Du Roy-t, një gazetar i pashëm, ambicioz dhe i paskrupullt, që shfrytëzon gratë që mashtron për të përmirësuar karrierën e vet.
Nga fillimet e përhumbura ai bëhet një reporter i suksesshëm dhe një gazetar politik, falë ndihmës së miqve të gruas së vet, me të cilën martohet pasi mbetet vejushë.
Ai ndahet me të shumë shpejt për të përfituar nga pasuritë e një gruaje tjetër.
Kjo është një karrierë gazetareske përmes martesave që paraqet një panoramë cinike mbi botën e gazetarisë dhe një këndvështrim pesimist mbi njerëzimin.
Stili i autorit
Si një nga dashamirësit e realizmit, Guy de Maupassant shkroi për personazhe komplekse që janë moralisht të paqartë dhe plotësisht njerëzore.
Nga 1874 deri në 1886-n, impresionistët portretizuan jetën e përditshme, të shekullit XIX në pikturat e tyre dhe, për pasojë, u refuzuan nga kritikat e artit të Sallonit.
Ata përfundimisht filluan të tregojnë veprat e tyre në mënyrë të pavarur, të cilat hapën botën e artit për publikun parisien.
Në të njëjtën mënyrë, Mopasan krijoi personazhe për të jetuar këtë jetë të shekullit XIX, përmes historive të tij dhe prezantoi botën në kulturën parisiene, duke përfshirë problemet e shoqërisë franceze.
Në këtë histori, George Du Roy është një gazetar në pritje për gazetën kryesore në Paris, La Vie Française.
Ai e kupton shumë shpejt se, për të mbijetuar dhe për të arritur statusin në këtë profesion, ai duhet të jetë pjesë e sistemit të korrupsionit dhe manipulimit.
Edhe ndërsa Georges është vazhdimisht në kërkim të presë së tij të ardhshme, ai duhet të vazhdojë farsën, ndërsa shëtit rrugëve me shkopin dhe kapelën e fiksuar në një kënd të kokës për të pasqyruar arrogancën e tij.
Autori përdor rrëfimin e personit të parë, përmes syve të Du Roy në Bel-Ami, dhe për këtë arsye është personazhi i vetëm që është zhvilluar plotësisht.
Ne mësojmë për rregullat dhe zakonet e shoqërisë franceze përmes mendimeve, përvojave dhe ndërveprimeve të tij me personazhe dytësorë.
Kjo na ndihmon të shohim narcizmin e Du Roy-t.
Në fund të historisë, Du Roy i përmbush qëllimet e tij dhe është fitimtar në lavdi dhe pasuri, madje edhe në mashtrimin e një martese të shtirur me Suzanne.
Mopasan shkroi “Bel Ami” për të protestuar ndaj këtij lloji të aristokracisë dhe egoizmit të gjetur në personazhin e Du Roy-t, për të cilin ai shkruan:
«Le monde est à lui. Il aura bientôt tout ce qu’il a toujours voulu. Il ne voyait personne. Il ne pensait qu’à lui » (marrë nga libri origjinal)
“Bota është e tija. Së shpejti do të ketë gjithçka që ka dashur ndonjëherë. Nuk pa askënd, mendonte vetëm për veten e tij “.
Menjëherë pas përfundimit të “Bel-Ami”, Mopasan-i u bashkua me një grup aktivistësh në Paris, që luftuan kundër këtij korrupsioni dhe koprracie.
Referuar:
Bel-Ami by Guy de Maupassant: My Book Review
/Albanianpost.com
