Presidenti i Republikës, Bajram Begaj, e ka quajtur hapjen e bazës ajrore të Kuçovës një kapitull të ri në historinë e mbrojtjes dhe sigurisë së Shqipërisë.
Gjatë ceremonisë së hapjes së bazës, Begaj theksoi se sot po dërgohet një mesazh i fuqishëm për paqen dhe po dëshmohet se NATO-ja është e vendosur të mbrojë lirinë dhe sigurinë e aleatëve, duke garantuar mbrojtje kolektive.
“Jetësimi i bazës shënon një kapitull të ri në historinë e mbrojtjes së vendit tonë. Është rezultat i bashkëpunimit mes aleatëve, nga kjo bazë ne së bashku dërgojmë mesazhin e paqes dhe dëshmojmë se NATO është e gatshme të mbrojë lirinë e aleatëve”, parashtroi kreu i shtetit.
Ai nuk la pa përmendur edhe detyrimet që rrjedhin nga NATO-ja, të cilat janë edhe interesat strategjike të Shqipërisë.
Baza e NATO-s simbolizon një urë ku e shkuara dhe e tashmja bashkohen, për Begajn. Është po ashtu edhe një simbol për të mbrojtur vendin, ku Shqipëria nuk u zgjodh rastësish sipas tij, duke dëshmuar besimin e aleatëve, si një partnere e denjë dhe e përkushtuar.
“Një investim shumë i nevojshëm dhe i mirëpritur ndër vite. Agresioni rus ndaj Ukrainës, situata në Lindjes e Mesme, përbëjnë sfida”, përmend ai më tej.
Në vijim, presidenti shtoi se konfrontimet politiko-ushtarake rrezikojnë të përshkallëzohen dhe të përhapen. Kjo u pa më së miri shtatorin e kaluar në sulmin terrorist të Banjskës, në Kosovë, përmendi ai rastin.
“Ai sulm tregoi se sa e brishtë është siguria në rajonin tonë dhe dëshmoi se ka ende aktorë lokalë, të cilët mundohen ta projektojnë të ardhmen nëpërmjet një të kaluare e cila nuk duhet të kthehet më”.
“Në këtë situatë sigurie globale të paqëndrueshme, ne duhet të jemi gjithmonë të gatshëm për të mbrojtur veten, dhe për të kontribuar në Aleancë për garantimin e paqes, sigurisë, dhe stabilitetit”.
Ndaj, Presidenti përçoi mesazhin se Baza e Kuçovës ka një mision mbrojtës, një qendër e rëndësishme për operacionet e NATO-s, për të përballuar kërcënimet e sotme dhe të nesërme.
Shqipëria, në fjalët e tij, do të vijojë të luajë rolin e saj konstruktiv në rajon e më gjerë.
Rritja e buxhetit për mbrojtjen, modernizimi i forcave tona të armatosura, rritja e kapaciteteve mbrojtëse dhe fuqizimi i kapaciteteve njerëzore janë domosdoshmëri, përkufizoi më tej.
“Unë mbështes çdo nismë që qeveria ka ndërmarrë për mbështetjen sociale të personelit të Forcave të Armatosura sepse të jesh pjesë e Forcave të Armatosura nuk është vetëm një profesion, është krenari kombëtare, i shërben Atdheut dhe kauzës së lartë të paqes dhe sigurisë”.
Teksa, në fund, nënvizoi se kjo bazë, si dhe angazhimi i Shqipërisë në NATO, është investim në mbrojtjen e vendit tonë, është investim në të ardhmen e fëmijëve tanë dhe brezave që do të vijnë pas nesh, është dëshmi e përkushtimit tonë për të punuar së bashku me aleatët, për të ndërtuar një botë më të sigurt për të gjithë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
