Bashkimi Evropian po heton platformën X të Elon Musk mbi përhapjen e mundshme të përmbajtjes terroriste dhe të dhunshme pas sulmit të Hamasit ndaj Izraelit.
Hetimi, i pari sipas rregullave të reja teknologjike të BE-së, do të shikojë gjithashtu mënyrën se si trajtohen ankesat.
X ka thënë se ka hequr qindra llogari të lidhura me Hamasin nga platforma.
TikTok dhe Meta janë paralajmëruar gjithashtu nga BE-ja se nuk kanë bërë sa duhet për të trajtuar dezinformimin.
Firmat e mediave sociale kanë parë një rritje të dezinformatave rreth konfliktit midis Izraelit dhe Hamasit, duke përfshirë imazhe të modifikuara dhe video me etiketa të gabuara.
Shefi i industrisë së BE-së, Thierry Breton, ka konfirmuar se blloku i kishte dërguar X një “kërkesë zyrtare për informacion” për të përcaktuar nëse platforma ishte në përputhje me Aktin e Shërbimeve Digjitale (DSA).
Një ligj i krijuar për të mbrojtur përdoruesit e platformave të mëdha të teknologjisë që ka hyrë në fuqi së fundmi.
Shefja ekzekutive e X, Linda Yaccarino, ka thënë më herët se platforma ka hequr qindra llogari të lidhura me Hamasin dhe se ka ndërmarrë veprime për të hequr ose etiketuar dhjetëra mijëra pjesë të përmbajtjes që nga sulmi i së shtunës, në përgjigje të një letre nga Breton.
Hamasi, një grup militant palestinez, është një organizatë terroriste e ndaluar në BE.
Të paktën 150 pengje u morën në Gaza dhe 1 mijë e 300 njerëz u vranë gjatë sulmeve vdekjeprurëse të Hamasit në Izrael në fundjavë.
Ndërkohë, më shumë se 1 mijë e 500 njerëz janë vrarë në Gaza që kur Izraeli nisi sulmet ajrore hakmarrëse.
Programi Botëror i Ushqimit i OKB-së e ka quajtur situatën në Gaza “të tmerrshme”, ku ushqimi dhe uji po mbarojnë gjatë një rrethimi izraelit.
Izraeli ka thënë se bllokada nuk do të përfundojë derisa pengjet e tij të lirohen.
Në letrën drejtuar Musk, Breton ka thënë se përmbajtja e dhunshme dhe terroriste nuk ishte hequr nga X, pavarësisht paralajmërimeve.
Breton ka shtuar se raste të “imazheve dhe fakteve të rreme dhe të manipuluara” janë raportuar gjerësisht në platformën e mediave sociale.
Në përgjigje, Musk ka thënë se “politika jonë është që gjithçka të jetë e hapur dhe transparente, një qasje që unë e di që BE e mbështet”.
“Ju lutemi renditni shkeljet për të cilat aludoni, në mënyrë që publiku t’i shohë ato”, ka shtuar ai.
DSA u bë ligj nëntorin e kaluar, por firmave iu dha kohë për t’u siguruar që sistemet e tyre ishin në përputhje.
Më 25 prill, komisioni emëroi platformat shumë të mëdha online – ato me mbi 45 milionë përdorues të BE-së – që do t’u nënshtroheshin rregullave më të ashpra.
Ligji hyri në fuqi katër muaj më vonë në gusht.
Sipas rregullave, firmat më të mëdha duhet të vlerësojnë rreziqet e mundshme që mund të shkaktojnë, të raportojnë atë vlerësim dhe të vendosin masa për t’u marrë me problemin.
Kjo pasi mosrespektimi i DSA-së mund të rezultojë në gjoba të BE-së deri në 6% të xhiros globale të një kompanie ose pezullim të mundshëm të shërbimit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
