BE nis hetim zyrtar ndaj TikTok-ut

Komisioni Evropian ka hapur një hetim për të vlerësuar nëse platforma TikTok mund të ketë shkelur Aktin e Shërbimeve Digjitale (DSA) në fushat që lidhen me mbrojtjen e të miturve, transparencën e reklamave, aksesin e të dhënave për studiuesit, si dhe menaxhimin e rrezikut të përmbajtjes së dëmshme.

Sipas KE, masa vjen në bazë të hetimit paraprak të kryer deri më tani, duke përfshirë një analize të raportit të vlerësimit të rrezikut të dërguar nga TikTok-u në shtator 2023, si dhe përgjigjet e TikTok-ut ndaj kërkesave zyrtare për informacion.

Një nga fokuset e hetimit do të jetë pajtueshmëria me detyrimet e DSA-së në lidhje me vlerësimin dhe zbutjen e rreziqeve sistematike, për sa i përket efekteve negative aktuale ose të parashikueshme që rrjedhin nga dizajni i sistemit të TikTok-ut.

Këtu, përfshirë sistemet algoritmike që mund të stimulojnë varësi të sjelljes.

“Një vlerësim i tillë kërkohet për të kundërshtuar rreziqet e mundshme për ushtrimin e të drejtës themelore për mirëqenien fizike dhe mendore të personit, respektimin e të drejtave të fëmijës si dhe ndikimin e saj në proceset e radikalizimit”, thihet në njoftim.

Po ashtu nën hetim do të jetë edhe pajtueshmëria me detyrimet e DSA-së për të vendosur masa të përshtatshme dhe proporcionale për të garantuar një nivel të lartë privatësie dhe sigurie për të miturit, veçanërisht në lidhje me cilësimet e paracaktuara të privatësisë për të miturit, si pjesë e projektimit dhe funksionimit të sistemeve të tyre rekomanduese.

Gjithashtu pajtueshmëria me detyrimet e DSA-së për të siguruar një depo të kërkueshme dhe të besueshme për reklamat e paraqitura në TikTok.

Sakaq, KE sqaron se hetimi ka të bëjë po ashtu me mangësi të dyshuara në dhënien e kërkuesve akses në të dhënat e aksesueshme publikisht të TikTok, siç kërkohet nga neni 40 i DSA-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.