BE krijon një mision të ri ushtarak për Ukrainën

Këshilli i BE-së miratoi një vendim për krijimin e Misionit të Ndihmës Ushtarake të Bashkimit Evropian në Ukrainë (EUMAM Ukraine).

Kështu thuhet në një deklaratë në faqen e Këshillit.

“Qëllimi i misionit është të ndihmojë në rritjen e kapacitetit ushtarak të Forcave të Armatosura të Ukrainës për të kryer në mënyrë efektive operacione ushtarake për të lejuar Ukrainën të mbrojë integritetin e saj territorial brenda kufijve të njohur ndërkombëtarisht, të ushtrojë në mënyrë efektive sovranitetin e saj dhe të mbrojë popullsinë civile”, thuhet në deklaratë.

Në përgjigje të kërkesës së Ukrainës për mbështetje ushtarake, misioni do të sigurojë trajnime individuale, kolektive dhe të specializuara të Forcave të Armatosura.

Kjo, duke përfshirë Forcat e Mbrojtjes Territoriale, si dhe koordinimin dhe sinkronizimin e aktiviteteve të shteteve anëtare që kontribuojnë në trajnim.

Misioni EUMAM Ukraine do të operojë në territorin e shteteve anëtare të BE-së dhe do të ketë një Shtabi Operacional në Bruksel për të siguruar koordinimin e përgjithshëm në nivel strategjik.

Komandanti i misionit do të jetë zëvendës-admirali Hervé Blejean, drejtor i Forcës së Planifikimit dhe Operacionit Ushtarak (MPCC).

Mandati i misionit fillimisht do të zgjasë dy vjet, dhe referenca financiare për shpenzimet totale për këtë periudhë do të jetë 106 milionë e 700 mijë euro.

Këshilli i BE-së miratoi gjithashtu dhënien e 500 milionë eurove të tjera në kuadër të Fondit Evropian të Paqes për të mbështetur më tej aftësitë dhe stabilitetin e Forcave të Armatosura të Ukrainës.

Kësti i gjashtë do të sjellë kontributin total të BE-së në fondin për Ukrainën në 3.1 miliardë euro.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.