Shqipëria

BE kërkon energji të rinovueshme në kurriz të Ballkanit


Komisioni Evropian dëshiron të krijojë zinxhirë të besueshëm furnizimi për materialet që i duhen Bashkimit Evropian për të përshpejtuar kalimin te burimet e rinovueshme të energjisë dhe një ekonomi të gjelbër.

Nxjerrja e litiumit, bakrit dhe mallrave të tjera të nevojshme po rrezikon komunitetet lokale.

Administrata në Bruksel është vendosur të ulë barrën mjedisore, por Ballkani Perëndimor dhe vendet e tjera të treta mund të marrin një barrë edhe më të rëndë.

Bashkimi Evropian ka ambicie të larta për dekarbonizimin e sektorit të energjisë në mënyrë që ai të mund të bëhet neutral ndaj klimës deri në vitin 2050.

Kalimi në energjinë e erës dhe diellore kërkon sasi masive materialesh që përfshijnë bakrin, litiumin dhe elementët të tjerë.

Ato do të duhet të minohen dhe të përpunohen në sasi të paimagjinueshme, por teknologjitë ekzistuese nuk janë aspak të gjelbra kur bëhet fjalë për ndikimin në komunitetin lokal dhe natyrën.

Përveç kësaj, kompanitë minerare ende përdorin rregullisht lëndë djegëse fosile, të cilat mbeten të domosdoshme për prodhimin e pajisjeve dhe transportin.

Marrëveshja e Gjelbër Evropiane e vitit 2020 tashmë tregoi se shiriti për standardet e mbrojtjes së mjedisit do të ulet për furnizimin e mallrave edhe në territorin e BE-së.

Me planin “REPowerEU”, i nisur menjëherë pas pushtimit të Ukrainës nga Rusia, Komisioni Evropian i dha përparësi kalimit te burimet e rinovueshme si pjesë e përpjekjeve për të shkurtuar urgjentisht përdorimin e karburanteve fosile ruse.

Nisma nënkupton standarde më të ulëta mjedisore për nxjerrjen e mallrave, në mënyrë që kapacitetet e energjisë elektrike të gjelbër të mund të instalohen së bashku me ruajtjen e energjisë që është e nevojshme për të balancuar furnizimin me energji elektrike.

Gjegjësisht, fermat e erës dhe diellore varen nga moti për prodhimin e tyre, kështu që mund të ketë shumë ose shumë pak energji elektrike në rrjet nga një minutë në tjetrën.

BE-ja ka nevojë për lëndë të para nga vende të treta të besueshme

Administrata në Bruksel po mbështet te vendet që i sheh si të besueshme për të siguruar materialet kritike për tranzicionin energjetik.

Duke pasur parasysh që rregullat e mbrojtjes së mjedisit për minierat janë shumë strikte në BE, njerëzit dhe biodiversiteti në rajone si Ballkani Perëndimor janë një zgjedhje e qartë për të marrë një barrë shumë më të rëndë.

Balkan Green Energy News” – platforma që mbulon energjinë e qëndrueshme, veprimet klimatike, mbrojtjen e mjedisit dhe zhvillimet e lëvizshmërisë urbane – shkruan se Ballkani është në shënjestër për gjetjen e bakrit.

Projektet e bakrit janë të përqendruara më së shumti në Serbi, me 15 pika.

Po ashtu janë identifikuar 43 projekte në Turqi, 11 në Bullgari, nëntë në Qipro dhe Rumani dhe dy në Bosnje dhe Hercegovinë.

Më pas ka dhjetë vende potenciale të minierave të nikelit: tre në Shqipëri dhe Turqi, dhe nga një në Serbi, Maqedoninë e Veriut, Kosovë dhe Greqi.

Minierat dhe përpunimi i litiumit, bakrit dhe nikelit mund të jenë shkatërruese për shëndetin e popullatës, bujqësinë, burimet e ujit dhe biodiversitetin.

Ndërtimi i objekteve të tilla nënkupton zhvendosje masive, ndërkohë që ka një ndikim të rëndë edhe në zonat përreth.

BE- ja kërkon litiumin

Artikulli tregon për vonesat në projektin e minierave të litiumit Barroso në Portugalinë verilindore.

Investitori, “Savannah Resources”, po përpiqet të kapërcejë barrierat administrative dhe rezistencën midis ambientalistëve dhe popullatës lokale.

Raporti theksoi të dhënat e marra nga “S&P Global” mbi projektet e minierave në të gjithë Evropën, ku grupi më i madh është në pjesën qendrore të gadishullit Ballkanik.

Ai përfshin Serbinë, Kosovën, Shqipërinë, Maqedoninë e Veriut dhe pjesën perëndimore të Bullgarisë.

/Albanianpost.com

Lajmet kryesore