BE-ja mund t’i ofrojë Hungarisë dhe Sllovakisë përjashtim nga embargoja e naftës ruse

Komisioni Evropian mund ta kursejë Hungarinë dhe Sllovakinë nga një embargo për blerjen e naftës ruse.

Kjo, duke treguar kujdes nga fakti se sa të varura janë të dyja vendet nga nafta e papërpunuar ruse, sipas dy zyrtarëve të Bashkimit Evropian.

Të martën e 3 prillit, Komisioni pritet të finalizojë punën për paketën e ardhshme dhe të gjashtë të sanksioneve të BE-së kundër Rusisë për veprimet e saj në Ukrainë.

Ajo do të përfshijë ndalimin e blerjes së naftës ruse, eksportet e së cilës janë një burim kryesor i të ardhurave të Moskës.

Hungaria, e varur nga nafta ruse, ka thënë vazhdimisht se nuk do t’i nënshkruajë sanksionet që përfshijnë energjinë.

Po ashtu edhe Sllovakia që është një nga vendet e BE-së më të varura nga karburantet fosile ruse.

Komisioni, për të mbajtur bllokun 27-vendesh të bashkuar, mund t’i ofrojë Sllovakisë dhe Hungarisë “një përjashtim ose një periudhë të gjatë tranzicioni”.

Të paktën kështu ka pohuar një nga zyrtarët për agjencinë e lajmeve “Reuters”.

Gjithsesi embargoja e naftës ka të ngjarë të hyjë, me shumë gjasa që të hyjë në fuqi nga fillimi i vitit të ardhshëm.

Evropa është destinacioni për gati gjysmën e eksporteve të naftës së papërpunuar dhe produkteve të naftës së Rusisë.

Ajo i ka siguruar Moskës një burim të madh të ardhurash që vende si Letonia dhe Polonia janë të mendimit se duhet të shkurtohen, për të ndaluar financimin e veprimeve ushtarake në Ukrainë.

Vendet e BE-së i kanë paguar Rusisë afro 20 miliardë euro që nga 24 shkurti, kur ajo pushtoi Ukrainën në atë që Moska e quan një “operacion special ushtarak”.

BE-ja, në përgjithësi, është e varur nga Rusia për 26 për qind të importeve të saj të naftës. Por mbështetja ndryshon midis vendeve.

Sllovakia dhe Hungaria, të dyja në rrugën jugore të tubacionit Druzhba që sjell naftën ruse në Evropë, janë veçanërisht të varura.

Ato kanë marrë vitin e kaluar përkatësisht 96 për qind dhe 58 për qind të importeve të tyre të naftës bruto dhe produkteve të naftës nga Rusia, sipas Agjencisë Ndërkombëtare të Energjisë.

Gjermania, blerësja kryesore e naftës ruse në BE, ka thënë ditët e fundit se mund të menaxhojë një embargo të naftës, pasi fillimisht ka rezistuar nga frika e kostos ekonomike.

Ajo, me 555 mijë fuçi në ditë, ka importuar 35 për qind të naftës së saj të papërpunuar nga Rusia në vitin 2021.

Por javët e fundit e ka ulur atë në 12 për qind.

“Një embargo nafte me një periudhë të mjaftueshme tranzicioni do të ishte e menaxhueshme në Gjermani, duke iu nënshtruar rritjes së çmimeve”, ka deklaruar Ministria gjermane e Ekonomisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.