BE duhet të veprojë ‘sa më shpejt të jetë e mundur’ kundër kërcënimeve të Gazprom

Plani i Gazprom për të shkurtuar dërgesat e gazit në Evropë tregon se vendet e BE-së duhet të bien dakord të reduktojnë përdorimin e tyre të gazit rus këtë dimër, ka thënë një ministër nga Republika Çeke, vendi i të cilit mban presidencën e Bashkimit Evropian.

“Putin do të vazhdojë të luajë lojërat e tij të pista në keqpërdorimin dhe shantazhimin e furnizimeve me gaz”, tha ministri çek i industrisë dhe tregtisë Jozef Sikela ndërsa mbërriti për të diskutuar planin e përbashkët me ministrat e energjisë të BE-së në Bruksel.

Shkurtimi i Gazprom “është vetëm një provë shtesë se ne duhet ta marrim lojën në duart tona dhe duhet të reduktojmë varësinë nga furnizimet ruse sa më shpejt të jetë e mundur”, shtoi ai.

Ndërsa, shefja e politikës energjetike të Bashkimit Evropian theksoi se njoftimi i Gazprom se do të shkurtojë më tej furnizimet në Evropë këtë javë është i motivuar politikisht.

“Ne e dimë se nuk ka asnjë arsye teknike për ta bërë këtë. Ky është një hap i motivuar politikisht dhe ne duhet të jemi gati për këtë. Dhe pikërisht për këtë arsye, ulja parandaluese e kërkesës sonë për gaz është një strategji e mençur”, tha Kadri Simson.

Ajo shtoi se priste që ministrat të arrinin një marrëveshje mbi rregullat emergjente të BE-së që u kërkonin vendeve të frenojnë kërkesën e tyre për gaz.

Firma ruse e energjisë Gazprom njoftoi se po redukton rrjedhat e gazit në Gjermani për të lejuar punën në një turbinë në tubacionin Nord Stream 1.

Por, presidenti i Ukrainës Volodymyr Zelensky tha se ky ishte thjesht “shantazh gazi” kundër Evropës.

Kjo vjen pasi shpresat mbeten se eksportet e grurit nga portet ukrainase mund të rifillojnë këtë javë pas një marrëveshjeje.

Gazprom tha të hënën se duhej të shkurtonte furnizimin me gaz në rreth gjysmën e niveleve aktuale në mënyrë që të kryente punë mirëmbajtjeje, por qeveria gjermane tha se nuk kishte asnjë arsye teknike që ajo të kufizonte furnizimin.

Monopoli rus i eksportit të gazit tha se po ndalonte funksionimin e njërës prej dy turbinave të fundit që operojnë për shkak të “gjendjes teknike të motorit”, duke ulur furnizimet ditore të gazit përmes gazsjellësit Nord Stream në 33 milion metra kub në ditë, rreth 20% e kapaciteti i tubacionit.

Tubacioni Nord Stream 1, i cili kalon nën Detin Baltik për të pompuar gazin nga Rusia në Gjermani, tashmë ka funksionuar shumë nën kapacitetin për javë të tëra dhe u mbyll plotësisht për një pushim 10-ditor në fillim të këtij muaji.

Rusia furnizoi BE-në me 40% të gazit të saj vitin e kaluar dhe BE e ka akuzuar Rusinë për përdorimin e energjisë si armë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.