Skuadra e Bayern Munich është duke menduar për përforcime për sezonin e ardhshëm, teksa kanë arritur marrëveshje për transferimin e mesfushorit austriak, Konrad Laimer.
Ky i fundit është pjesë e Leipzig-ut dhe do të transferohet në Munih në qershorin e vitit të ardhshëm me parametra zero, pasi që i skadon kontrata me ekipin e Red Bullit.
Laimer ishte pjesë e Leipzig-ut që nga vera e vitit 2017, kur ishte transferuar nga Salzburg-u për shumën e 7 milionë eurove.
Deri më tani ai numëron 167 ndeshje në të gjitha garat me skuadrën e Leipzig, prej të cilave ka shënuar 11 gola.
Nga muaji janar 25-vjeçari është i lirë të vendosë vetë të ardhmen e tij, megjithatë mediat në Gjermani raportojnë se austriaku ka arritur marrëveshjen me Bayern-in dhe ka refuzuar ofertat e Chelsea-t e Liverpool-it.
Një rol të rëndësishëm në vendimin e Laimer ka luajtur edhe trajneri Nagelsmann, pasi të dy kanë punuar edhe te Leipzig, ndaj tani do të kenë mundësinë të bashkohen te skuadra bavareze.
Vlen të theksohet se gjermanët po lëvizin me shpejtësi drejt futbollistëve me parametra zero, teksa pas Laimer, synimi i radhës është firma me Marcus Thuram, sulmues francez i Borussia Monchengladbach, që gjithashtu do të jetë i lirë në fund të sezonit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
