Alessandro Florenzi u dëgjua pasditen e djeshme nga Prokuroria e FIGC-së (Federatës Italiane të Futbollit) për të sqaruar qëndrimin e tij në lidhje me hetimet nga prokurorët e Torinos në lidhje me bastet e paligjshme. Lojtari i Milan-it duket se është i regjistruar në regjistrin e të dyshuarve për kryerje të paligjshme të lojërave apo aktiviteteve të basteve.
Siç raportohet në edicionin e sotëm të “La Gazzetta dello Sport”, siç bëri Florenzi në Prokurorinë e Torinos dy javë më parë, edhe para prokurorit federal Giuseppe Chine, mbrojtësi i lindur në vitin 1991 përsëriti se kishte përdorur platformat e paligjshme, por se ai nuk kishte vënë bast për futbollin, sjellje që do të çonte në skualifikim siç ndodhi tashmë me Nicolo Fagioli dhe Sandro Tonali.
Marrja në pyetje e Florenzi-t në Prokurorinë e FIGC, teorikisht, nuk ishte planifikuar, duke qenë se lojtari gjithmonë ka mohuar të ketë vënë baste në futboll dhe hetimet e Torinos nuk kanë vërtetuar kurrë të kundërtën.
Vetëm mendoni për Nicolo Zaniolo. Anësori sulmues i Aston Villa-s i ka hedhur poshtë gjithmonë akuzat se ka vënë bast edhe për futbollin me hetimet që e kanë vërtetuar të drejtën dhe për këtë arsye ai nuk është thirrur asnjëherë në Prokurori nga Chine.
Histori ndryshe për Fagioli-n dhe Tonali-n të cilët përmes avokatëve të tyre përkatës kërkuan të dëgjoheshin për të rrëfyer se kishin vënë baste në futboll dhe për të bashkëpunuar me hetuesit e FIGC.
Nuk është zbardhur ende arsyeja pse Florenzi shkoi në Prokurorinë e FIGC. Duket se ka dy rrugë të mundshme për momentin. Nga sa duket Prokuroria do të kishte zgjedhur ta dëgjonte sepse komunikimi me shkrim nuk kishte ardhur nga Torino, por kishte pasur vetëm një komunikim gojor.
Megjithatë, ekziston edhe hipoteza shumë konkrete se emri i Florenzi-t u ngrit nga një prej dy lojtarëve të përfshirë dhe dënuar, veçanërisht nga ish-lojtari i Milan-it tani te Newcastle, Tonali.
Tani pozicioni i Florenzi-t u qartësua. Lojtari u shfaq në Romë dhe u intervistua për pak më shumë se dhjetë minuta, në të cilat ai përsëriti atë që tha në Torino, baste në platforma të paligjshme, por kurrë në futboll.
Versioni i tij, i konsideruar tashmë i besueshëm nga Prokuroria e Torinos, ka bindur gjithashtu edhe Chine-n. Florenzi deklaroi se nuk është përqendruar kurrë te futbolli (në baste), tha avokati i lojtarit të Milan-it, Gianluca Tognozzi, i cili e mbron atë së bashku me Antonio Conte-n (avokat, jo trajneri).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
