Shqipëria

Bashkëpunimi mes Shqipërisë dhe Azerbajxhanit, së shpejti konkretizim projektesh


Rritja e fuqisë së prodhimit të Gazsjellësit Trans-Adriatik (TAP) dhe zbatimi i projekteve të gazifikimit do ta bëjnë Shqipërinë vendin e shtatë evropian që furnizohet me gaz azerbajxhanas.

Kështu deklaroi Ministria e Energjisë së Azerbajxhanit pas takimit të parë të Komisioni Ndërqeveritar për Bashkëpunimin Ekonomik ndërmjet dy vendeve.

Gjatë një takimi me zëvendëskryeministren e Shqipërisë, Belinda Balluku, bashkëkryetari i komisionit, ministri i Energjisë së Azerbajxhanit, Parviz Shahbazov, tha se nga viti 2026, priten furnizime vjetore me gaz azerbajxhanas në Shqipëri në masën prej rreth 200 milionë metër kub përmes TAP-it të zgjeruar.

Agjencia azere e lajmeve “Trend” sqaroi se këto 200 milionë metra kub në vit janë të destinuara për një termocentral të ri që po ndërtohet në Shqipëri pranë TAP-it.

Sipas burimit të saj, pjesa e mbetur prej një miliardë metër kub gaz përmes TAP-it do të kalojë tranzit përmes Shqipërisë drejt BE-së dhe për këtë furnizim është përgjegjëse Kompania e Furnizimit me Gaz të Azerbajxhanit.

Në deklaratë thuhet se gjatë ndërtimit të TAP-it në të gjithë Shqipërinë, vendi ka bërë investime në vlerën 1.5 miliardë euro, ndërsa pagesat e taksës së tranzitit do të arrijnë në 285 milionë euro në 25 vjet, dhe angazhimet sociale – 14 milionë euro.

Të dy ministrat diskutuan në Baku për ndihmën e Kompanisë Shtetërore të Naftës të Azerbajxhanit për gazifikimin e qytetit shqiptar të Korçës, si dhe studimin e perspektivës së përdorimit të impiantit të depozitimit të gazit shqiptar në qytetin e Dumresë.

Shahbazov shtoi se ngjarja COP29 që do të mbahet këtë vit nën kryesimin e Azerbajxhanit do të jetë edhe një herë një mundësi tjetër për solidaritetin e vendeve që mbështesin njëra-tjetrën në arenën ndërkombëtare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore