Bashkëpunimi me Policinë e Kosovës, Wigermark: Shembull në menaxhimin paqësor të krizës

Shefi i Misionit të Bashkimit Evropian për Sundim të Ligjit në Kosovë (EULEX), Lars-Gunnar Wigemark, shprehu vlerësimin e tij lidhur me bashkëpunimin mes Policisë së Kosovës, KFOR-it dhe EULEX-it.

Wigermark, përmes një cicërime në rrjetin social Twitter, tha se kriza e fundit në pjesën veriore të Kosovës vuri në pah bashkëpunimin e ngushtë që ekziston mes tre shtyllave të sigurisë në Kosovë. Madje, ai shtoi se është shembull i “librave shkollorë”.

“Koordinimi i ngushtë mes tre ofruesve të sigurisë në Kosovë, Policia e Kosovës, KFOR dhe EULEX gjatë krizës së fundit në veri është shembull i librave shkollorë, i bashkëpunimit civil dhe ushtarak në menaxhimin paqësor të një konflikti të paqëndrueshëm”.

Ndryshe, edhe zëdhënësi i BE-së për politikë të jashtme, Peter Stano, në një konferencë për media deklaroi se BE-ja dhe NATO, kanë bashkëpunim “shumë të ngushtë dhe të mirë”.

“Nuk është sekret që në kontekstin aktual strategjik bashkëpunimi i BE-së me NATO-n, është më i rëndësishëm dhe relevant se kurrë më parë. Kjo është parë edhe në praktikë”.

“Rasti i fundit ishte në veri të Kosovës, mes Krishtlindjeve dhe pushimeve për Vitin e Ri, kur BE-ja dhe NATO u koordinuan ngushtë në terren”, shtoi ai.

Ndërkaq, nga përshëndetja që i bënë diplomatët evropianë dhe ata amerikanë vendimit për largimin e barrikadave, u kuptua se në prapaskenë ishin zhvilluar negociata mes palëve për depërshkallëzim.

Mirëpo, kryeministri Albin Kurti garantoi se përveç komunikimit me shtetet e QUINT-it, EULEX-in dhe KFOR-in “s’kemi ofruar asgjë në shkëmbim përveç kohës shtesë për KFOR-in”

Afërsisht tri javë pjesa veriore e Kosovës mbeti e bllokuar nga 16 barrikada të vendosura nga serbët lokalë dhe të mbrojtura nga persona të maskuar dhe të armatosur.

Ato u vendosen pas arrestimit të ish-policit të Kosovës nga komuniteti serb, Dejan Pantiç, i cili akuzohet për sulm terrorist në veri nga autoritetet kosovare.

Policia e Kosovës nuk i largoi dot barrikadat, derisa KFOR-i nuk u përgjigj pozitivisht në kërkesën e Qeverisë së Kosovës për t’i larguar.

Derisa dukej se situata po shkonte drejt shpërthimit, meqë hedhja e shok-bombave dhe shkrepja e plumbave filloi të bëhet rutinë ditore në veri, situata mori një kthesë tjetër.

Në një vendim ende të pasqaruar mirë, Gjykata Themelore në Prishtinë vendosi ta lëshojë ish-policin Pantiç, pasi Prokurori argumentoi se atij nuk iu plotësuan kushtet e një të paraburgosuri.

Pantiç u mbajt në një kontejner në veri, për shkak të bllokadave që pamundësonin transportimin e tij në një qendër paraburgimi në jug.

Kosova, me një veprim të paprecedent, kishte garantuar se askush nga ata që sulmuan policët, hodhën bomba dhe bllokuan rrugët, nuk do të ndiqet penalisht.

Presidenti i Serbisë u kërkoi serbëve të Kosovës që të heqin barrikadat, pasi u tha se “të gjitha kërkesat na janë plotësuar”. Ata e dëgjuan.

Në komunikatën përshëndetëse, BE-ja dhe SHBA-të, protestuesit e armatosur dhe barrikadat i quajtën “mjete paqësore për protestë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.