Barrikadat në Veri, doganierët mbesin të bllokuar

Sindikata e Pavarur e Doganës së Kosovës, ka bërë të ditur se doganierët e sistemuar në pikën kufitare Jarinjë që nga e dita e shtunë janë në krye të detyrës zyrtare pa pasur mundësi të kryhen ndërrimet me oficerët tjerë doganorë.

Përmes një komunikate për media nga sindikata është thënë se oficerët e doganës nuk kanë mundësi të ndërrohen për arsye të bllokimit të rrugës në këtë pjesë të Kosovës.

“Oficerët Doganor që nga e shtuna janë në kryerje të detyrës zyrtare, duke mos pasur mundësi të kryhen ndërrimet me oficeret tjerë doganor, për arsye të bllokimit të rrugëve në këtë pjesë Republikës së Kosovës”, thuhet në njoftim.

Të njëjtit janë shpresojnë që personat e institucioneve të sigurisë që gjenden në Veri të mos kenë pasoja.

“Sindikata e Pavarur e Doganës së Kosovës uron që doganierët, policët dhe të gjithë qytetarët e Republikës së Kosovës prezent në atë pjesë që të mos kenë pasoja, njëherit fton institucionet kompetente që të kujdesen për sigurinë, kushtet e punës dhe shëndetin e doganierëve, policëve dhe qytetareve atje”, thuhet ndër të tjera në njoftim.

Tutje, kjo sindikatë ka falënderuar institucionet e Kosovës për sundimin e ligjit në Kosovë.

“Sindikata e Pavarur e Doganës së Kosovës si zë i fuqishëm i anëtarësisë së saj bashkëndjen punën me doganierët e sistemuar në PKK Jarinjë. Sindikata njëherit i përgëzon institucionet e Republikës së Kosovës e në veçanti doganierët e policët për vendosmërinë, guximin dhe përkushtimin e tyre drejt shtrirjes dhe sundimit të ligjit në tërë territorin e Republikës së Kosovës”.

Që nga 10 dhjetori, disa serbë lokalë në Veri ngritën barrikada dhe bllokuan rrugët që çojnë drejt pikave kufitare me Serbinë, Jarinjë dhe Bërnjak.

Veprimet e tyre u ndërmorën pasi Policia e Kosovës arrestoi ish-pjesëtarin e këtij institucioni, Dejan Pantiç, nën dyshimet për përfshirje në sulme kundër zyrtarëve të Komisionit Qendror të Zgjedhjeve në veri të Kosovës dhe atyre policorë.

Kosova dhe Serbia janë të gatshme që të de-eskalojnë situatën në Veri, kishte thënë Përfaqësuesi i Lartë i Politikës së jashtme dhe të sigurisë të Bashkimit Evropian, Josep Borrell në një prononcim për gazetarë para fillimit të mbledhjes së ministrave të shteteve anëtare në Këshillimin Evropian.

Më 10 dhjetor, presidentja e Kosovës, Vjosa Osmani, pas takimit konsultativ me partitë politike lidhur me mbajtjen e zgjedhjeve në Veri, ka vendosur t’i shtyjë zgjedhjet e jashtëzakonshme për katër komunat veriore – Mitrovicë e Veriut, Leposaviq, Zubin Potok dhe Zveçan të cilat do të mbaheshin me 18 dhe 25 dhjetor.

Osmani ka thënë se zgjedhjet për këto katër komuna do të mbahen më 23 prill të vitit 2023.

Arsyeja e shtyrjes së zgjedhjeve, sipas Osmanit, është niveli i rrezikshmërisë.

Por, pavarësisht shtyrjeve të zgjedhjeve situata në Veri vazhdon të jetë e tensionuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.