Bardhi kërkesë SPAK për çështjen McGonigal: Na informoni mbi ecurinë e hetimit për Ramën

Deputeti demokrat, Gazment Bardhi i ka kërkuar informacion Prokurorisë së Posaçme SPAK për zhvillimin e hetimeve në lidhje me çështjen e McGonigal.

“Pranimi i fajësisë nga shtetasi amerikan Charles F. McGonigal e lidhin këtë të fundit me veprime dhe mosveprime të kundërligjshme të shtetasit Edi Rama, me detyrë kryeministër i Shqipërisë. Përveç pagesës në të zezë për të nisur një hetim të rremë kundër kundërshtarëve politik të Kryeministrit, çka përbën qartësisht korrupsion aktiv të zyrtarëve të huaj, rezulton se gjatë dëshmisë për pranimin e fajësisë Charles F. McGonigal ka shpjeguar se marrëdhënien me Edi Ramën e krijoi për efekt të biznesit”, shkruan Bardhi në letrën drejtuar SPAK.

Në janar Bardhi bëri me dije se  i është drejtuar SPAK-ut duke i kërkuar nisjen e hetimeve për organizatë kriminale që sipas tij drejtohet nga kryeministri Edi Rama.

Bardhi ravijëzon se janë katër vepra penale si: “Korrupsion aktiv i nëpunësve të huaj publikë; Deklarimi i rremë i pasurive, interesave privatë të personave të zgjedhur dhe nëpunësve publikë; Pastrim i produkteve të veprës penale ose veprimtarisë kriminale dhe grup i strukturuar kriminal dhe kryerja e veprës penale nga grupi i strukturuar kriminal.

“SPAK nuk ka shumë punë për zbardhjen e kësaj afere kriminale. Mjafton të kërkojë zyrtarisht të plotë dosjen dhe provat pranë Gjykatës së Distriktit të Kolumbias në SHBA. Drejtësia që hesht përballë fakteve është drejtësi e vdekur. Shqiptarët kërkojnë dhe meritojnë një drejtësi që vepron ndaj kujtdo dhe që i jep fund kulturës së pandëshkueshmërisë”.

‘Arrestimi i ish-zyrtarit të FBI-së’, Bardhi dorëzon kallëzim në SPAK: Të hetohet Rama

Charles McGonigal, një ish-zyrtar i lartë në FBI, u deklarua fajtor për fshehjen e kontakteve të tij me zyrtarë të huaj dhe qindra mijëra dollarëve, që ai pranoi nga një ish-punonjës i një shërbimit shqiptar të inteligjencës.

Konkretisht ai u akuzua nga prokurorët për fshehjen e 225 mijë dollarëve, që ai kishte marrë nga një ish-agjenti shqiptar, Agron Neza.

Prokurorët pretenduan se McGonigal gjithashtu mashtroi FBI-në duke mos zbuluar siç duhet udhëtimet e tij jashtë shtetit dhe kontaktet me shtetas të huaj.

Kjo, ndërsa ishte ende i punësuar në byro.

Ai u deklarua fajtor për një akuzë të vetme të fshehjes së fakteve materiale të premten – dhe për këtë përballet me një dënim deri në pesë vjet burg dhe një gjobë maksimale prej 250 mijë dollarë.

Gjykatësi caktoi një seancë dëgjimore për 16 shkurt 2024.

Në këmbim të pranimit të fajësisë së tij, prokurorët ranë dakord t’i kërkonin gjyqtarit të hedhë poshtë tetë pika të tjera të përfshira në aktakuzën origjinale.

McGonigal u deklarua fajtor muajin e kaluar për akuza të veçanta në lidhje me punën e tij për një oligark rus.

Para se të tërhiqej në vitin 2018, McGonigal shërbeu si agjent special i ngarkuar me Divizionin e Kundërzbulimit të FBI-së në New York dhe krijoi një marrëdhënie me ish-punonjësin e inteligjencës shqiptare, i cili ishte bërë shtetas amerikan i natyralizuar, sipas aktakuzës.

Të dy udhëtuan drejt Shqipërisë dhe vendeve të tjera ku individi kishte interesa biznesi dhe u takua me shtetas të huaj në disa raste, thanë prokurorët.

Në një nga udhëtimet, sipas deklaratës së fakteve që McGonigal pranoi të premten, ai u takua me kryeministrin e Shqipërisë, një nga këshilltarët e tij dhe një politikan kosovar dhe nuk i raportoi ato takime.

Gjatë takimit të tij me kryeministrin e Shqipërisë, McGonigal dyshohet se i kërkoi atij të shmangte dhënien e licencave të shpimit të naftës për kompanitë ruse të frontit, sipas marrëveshjes për pranimin e fajësisë.

Prokurorët thanë se ish-punonjësi i inteligjencës dhe këshilltari i kryeministrit kishin një interes financiar në vendimet e Shqipërisë për kontratat.

McGonigal pranoi gjithashtu se ai shënoi në Departamentin e Drejtësisë punën lobuese të një shtetasi amerikan në emër të një kundërshtari politik të kryeministrit shqiptar.

FBI më vonë hapi një hetim për atë person bazuar në informacionin që McGonigal mori nga kontaktet e tij shqiptare dhe aleatët e kryeministrit.

Duke folur në gjykatë të premten, McGonigal i tha gjykatëses, Colleen Kollar-Kotelly, se paratë nga kontakti i tij shqiptar ishin një hua për të krijuar një firmë këshillimi pasi ai doli në pension nga FBI, të cilën ai pranoi se nuk duhej ta kishte pranuar.

“Dua t’i kërkoj falje FBI-së”, tha McGonigal të premten.

Në çështjen e New Yorkut, prokurorët pretenduan se McGonigal ishte në listën e pagave të Oleg Deripaska, të cilin ai e hetoi në rolin e tij si agjent i posaçëm i ngarkuar me divizionin e kundërzbulimit në zyrën e FBI-së.

Deripaska është sanksionuar nga SHBA që nga viti 2018, duke e bërë të paligjshme çdo biznes me të.

“Nuk duhet t’i merrja paratë nga ish-agjenti shqiptar”, sa vite burg rrezikon McGonigal dhe pse i fshehu udhëtimet në Shqipëri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.