Barbano takon kryesuesin e KPK-së, vlerëson bashkëpunimin ndërmjet EULEX-it dhe prokurorive të ndryshme në Kosovë
Një ditë pasi presidentja e Kosovës, Vjosa Osmani, tha se nuk do të dekretojë, Blerim Isufajn si kryeprokuror të ardhshëm të shtetit si dhe sulmoi Prokurorinë e Shtetit për mos-efikasitet, shefi i misionit të Bashkimit Evropian për Sundim të Ligjit, EULEX, Giovanni Pietro Barbano, ka takuar kryesuesin e Këshillit Prokurorial të Kosovës, Jetish Malokun, me të cilin, sipas tij, ka pasur një diskutim thelbësor.
Në një postim në platformën sociale, X, Barbano, ka thënë se e vlerëson bashkëpunimin e vazhdueshëm ndërmjet EULEX-it dhe prokurorive të ndryshme.
“Ritheksova mbështetjen tonë për një sistem prokurorial plotësisht të pavarur, pa presion/ndërhyrje politike”, ka shkruar Barbano.
Barbano ndër të tjera është shprehur i thellësisht i shqetësuar për faktin se prokuroria e Kosovës ende nuk e ka një Kryeprokuror të Shtetit.
Substantial discussion w/ Chairman of Kosovo Prosecutorial Council, Jetish Maloku. I praised the ongoing cooperation between EULEX & different Prosecution Offices & reiterated our support to a fully independent prosecutorial system, free from political pressure/interference. 1/2 pic.twitter.com/ULlfi38Twa
— Giovanni Pietro Barbano (@EulexHoM) October 18, 2023
Ndryshe, të mërkurën shefi i Zyrës së Bashkimit Evropian në Kosovë, Tomasz Szunyog, ka lënë të nënkuptohet se është në linjë me presidenten e Kosovës, Vjosa Osmani, për sa i përket emërimit të Kryeprokurorit të Shtetit.
Përmes një postimi në platformën sociale, X, diplomati çek, ka theksuar nevojën që procesi i përzgjedhjes së Kryeprokurorit të Shtetit të jetë transparente dhe mbi të gjitha i bazuar në meritokraci e drejtësi.
“I bëj thirrje autoriteteve të Kosovës që të ruajnë me vendosmëri parimet dhe standardet më të larta të sundimit të ligjit në zgjedhjen e vonuar të Kryeprokurorit të Shtetit”.
Një vit e gjysmë pasi Këshilli Prokurorial e zgjodhi Blerim Isufajn për kryeprokuror të ardhshëm të shtetit, presidentja e vendit, Vjosa Osmani, ka njoftuar se nuk do ta dekretojë këtë emër.
Në një konferencë për media të martën, Osmani ka thënë se ka pasur “10 shkelje në procedurën e përzgjedhjes” dhe se “është e obliguar, duke pasur parasysh shkeljet, të mos e bëjë dekretimin” e Isufajt për kryeprokuror.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com