Lajme

Banka Qendrore e Rusisë do të legalizojë minierat e kriptomonedhave


Banka Qendrore e Rusisë është gati të mbështesë legalizimin e minierave të kriptove, me kusht që minatorët rusë t’i shesin monedhat e prodhuara jashtë vendit.

Lajmi u bë i ditur nga kreu i Departamentit të Teknologjive Financiare të Bankës së Rusisë, Kirill Pronin.

Banka qendrore ka qenë zëri i linjës së ashpër në diskutimet e vazhdueshme për të ardhmen e kriptomonedhave në Rusi, duke propozuar një ndalim të përgjithshëm për shumicën e aktiviteteve të lidhura me kriptot, përfshirë edhe minierat.

Megjithatë, përballja me kundërshtimin e institucioneve të tjera qeveritare dhe me kufizimet financiare të vendosura gjatë luftës në Ukrainë, pozicioni i saj ka filluar të ndryshojë.

Guvernatorja Elvira Nabiullina muajin e kaluar tregoi se pagesat me kripto mund të lejohen nëse nuk “depërtojnë” në sistemin financiar rus.

Në të njëjtën kohë, ajo këmbënguli që monedhat digjitale, si Bitcoin, nuk duhet të tregtohen në platformat ruse, sepse këto asete janë shumë të paqëndrueshme dhe të rrezikshme për investitorët e mundshëm.

Ivan Chebeskov, drejtor i Departamentit të Politikave Financiare të Ministrisë së Financave, vuri në dukje se disa kompani të mëdha të minierave të kriptove, me bazë në Federatën Ruse, janë detyruar gjithashtu të merren me kufizime të huaja kur tërheqin fondet.

Ai sugjeroi se Rusisë mund t’i duhet të krijojë infrastrukturën e saj të këmbimit për të siguruar likuiditet për industrinë.

Kirill Pronin përsëriti, megjithatë, se sipas CBR, kriptomonedha e prodhuar nga minatorët në Rusi duhet të shitet jashtë kufijve të saj dhe të mos lejohet të grumbullohet brenda vendit.

Çështja është të shmanget krijimi i stimujve për përdorimin e mëvonshëm të tij në pagesat e brendshme.

Krahas projektligjit të ri “Për monedhën digjitale”, që pritet të rregullojë plotësisht hapësirën e kriptove të Rusisë, një projektligj i dedikuar “Për minierat në Federatën Ruse” u dorëzua në Dumën e Shtetit në prill.

Anëtarët e dhomës së ulët të Parlamentit rus propozojnë njohjen e minierave të kriptove si një aktivitet biznesi, duke përdorur infrastrukturën dhe pajisjet ruse të informacionit të vendosura në vend.

/Albanianpost.com


Lajmet kryesore