Ballkani është në luftë – në luftë kundër fushatës dezinformuese të Rusisë

Nuk është sekret se Rusia ka kohë që po udhëheq një fushatë kundër kombeve të vogla ballkanike dhe shteteve perëndimore, në mënyrë që të zgjerojë fushëveprimin dhe të shtrijë ndikimin në Ballkanin Perëndimor, por edhe të krijojë kushte që në pushtet të vijnë forcat pro-ruse dhe të provokojë trazira që do të prodhojnë destabilizimin e rajonit në të ardhmen.

Në një raport të fondacionit “Humanity for Freedom” të publikuar rishtas, janë spikatur praktikat e Rusisë në përpjekjet e saj për influencë globale, duke marrë forma të ndryshme, prej rekrutimit të liderëve dhe partive politike nacionaliste, deri në depërtimin dixhital për përhapjen e diskursit publik kundër insitucioneve demokratike dhe bashkësisë perëndimore.

Ky raport, nëpërmjet shqyrtimit të gjendjes aktuale në terren, ka synuar të hedhë dritë mbi shtrirjen dhe ndikimin e fushatave dezinformuese ruse në vendet e Ballkanit Perëndimor, duke ofruar njëkohësisht zgjidhje të zbatueshme për të garantuar mbrojtjen e institucioneve demokratike, sigurinë kombëtare dhe rajonale, veçanërisht pas agresionit rus në Ukrainë.

“Ballkani do të ndajë fatin e Ukrainës nëse liderët e saj dhe bota vazhdojnë të minimizojnë kërcënimin e Rusisë. Ballkani tashmë është në luftë. Kjo luftë është aktualisht një luftë dezinformimi, një luftë për të ngjallur dyshime dhe konfuzion, dhe një luftë për ta bërë të pashmangshëm konfliktin fizik në mënyrë që rusët të fitojnë. Rajoni dhe bota duhet të veprojnë”.

Shembuj të dezinformatave ruse mund të gjenden në vende të ndryshme, posaçërisht në Bullgari, Kosovë, Serbi dhe Maqedoni të Veriut. Për shembull, në Bullgari, propaganda ruse është përdorur për të vënë në dyshim legjitimitetin e qeverisë bullgare dhe për të hedhur dyshime mbi përfitimet e anëtarësimit në Bashkimin Evropian (BE), ka zbuluar raporti.

Në Serbi, shteti rus ka promovuar fushata dezinformuese që synojnë forcimin e lidhjeve tradicionale midis dy vendeve, duke e pozicionuar Rusinë si mbrojtëse të besimit të krishterë ortodoks dhe duke diskredituar BE-në dhe NATO-n, ndërsa në Maqedoninë e Veriut, dezinformimi rus ka kontribuar në paqëndrueshmërinë politike dhe sociale, duke shfrytëzuar tensionet etnike.

“Në Serbi, grupet pro-ruse të ekstremit të djathtë, sikurse Partia Radikale Serbe (SRS), kanë marrë mbështetje dhe financim nga burime ruse. Kjo mbështetje ka ardhur në forma të ndryshme, duke përfshirë financimin e aktiviteteve partiake, organizimin e ngjarjeve, ofrimin e trajnimeve për anëtarët e partisë dhe ndarjen e materialeve propagandistike ruse”.

“Rusia i ka ofruar mbështetje partisë politike të ekstremit të djathtë ‘Maqedonia e Bashkuar’, e cila kundërshton në mënyrë aktive Marrëveshjen e Prespës midis Maqedonisë së Veriut dhe Greqisë. Kjo mbështetje ka përfshirë financimin e fushatave, koordinimin me zyrtarët e partisë dhe ofrimin e udhëzimeve për strategjitë politike”, thuhet ndër të tjera në raport.

Sëkëndejmi, perspektiva e rrëshqitjes drejt skajeve të krizës nuk mund të izolohet; derisa krijohen kushte të favorshme për lojtarët lokalë serbë të lidhur me interesat ruse që të zgjerojnë hijen kërcënuese dhe të provokojnë konflikte rajonale nën mbështetjen e heshtur të Rusisë, rreziku i përshkallëzimit të dhunës tani rri i varur mbi mbarë Ballkanin Perëndimor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.