Balla thotë se nuk do të ketë më feude dhe bajraqe, mbi ligjin dhe qytetarët s’ka më të fortë

Sipas ministrit të Brendshëm, Taulant Balla, nuk do të ketë më në Shqipëri feude dhe bajraqe, e aq më pak të fortë, të cilët dalin mbi qytetarët dhe ligjin.

Kështu ka ravijëzuar ai gjatë fjalës në Kongresin e Partisë Socialiste, ku ka bërë edhe një bilanc të punës në krye të dikasterit të brendshëm.

“Ky Kongres i Partisë Socialiste erdhi në momentin e duhur, në aspektin e detyrave dhe bilanceve tona qeverisëse në të gjitha nivelet, por edhe të agjendës tonë politike që duhet të përmbyllet me fitoren e zgjedhjeve të radhës parlamentare”, theksoi fillimisht Balla.

Më tej, ai tha se lajmi i bukur, është mbyllja e vitit me shifrën e 10 milionë turistëve të huaj të ardhur, duke e certifikuar kështu Shqipërinë si një destinacion evropian me bukuri natyrore, mikpritje të pakonkurueshme dhe siguri mbresëlënëse.

Siguria publike, në këtë sezon turistik historik, ishte një test i rëndësishëm pasi certifikoi vendin tonë si një destinacion të sigurtë turistik, me zero ngjarje kriminale, ndaj jetës së turistëve të huaj të cilët zgjodhën Shqipërinë për të pushuar, sipas Ballës.

Sezoni i ri turistik do të ketë Forcën Kombëtare të Sigurisë Publike si një forcë shtesë për garantimin e sigurisë në destinacionet kryesore turistike.

Inspektoriati Kombëtar i Mbrojtjes së Territorit në bashkëpunim me Policinë e Shtetit dhe agjencitë e tjera do duhet të garantojnë plazhe të lira dhe bregdet të pastër, nga Velipoja deri në Ksamil.

Investimet në infrastrukturën rrugore, përdorimi i teknologjisë në kontrollet e policisë rrugore ka sjellë një përmirësim tepër të madh të indikatorëve të sigurisë në rrugët e Shqipërisë.

Në 10 vitet e fundit, numri makinave në pronësi të qytetarëve shqiptarë është dyfishuar, nga 445 mijë e 956 mjete në vitin 2013, në 758 mijë mjete në vitin 2022, ndërsa numri i aksidenteve është përgjysmuar nga 2 mijë e 75 në vitin 2013 në 1 mijë e 165 në vitin 2022, ndërsa 2023 do të vazhdojë trendi i uljes së numrit të aksidenteve.

Çfarë tha tjetër Balla në fjalën e tij?

Të dashur miq, Prej ditës së parë si Ministër i Brendshëm kam kuptuar se suksesi në këtë detyrë publike është i pamundur pa krijimin e një fryme skuadre në përpjekjen për të përmbushur objektivat në këtë sektor sfidues.
Kam shtrënguar duart me një pjesë të madhe të efektivëve dhe do të vijoj të takohem e dëgjoj me vëmendje çdo anëtar të trupës së Policisë. Rezultatet e arritura deri më tani janë vetëm fillimi i një revanshi të sundimit të ligjit ndaj krimit të organizuar.

Në territorin e kësaj republike s’mund të ketë më feude apo bajraqe, ku mbi ligjin dhe mbi qytetarët të jenë të fortët, të cilët edhe kur policia i shoqëronte tek dera e komisariatit, ata dilnin po atë ditë nga dritarja me vendime të blera tek tezgat e drejtësisë së vjetër.

Lufta kundër krimit të organizuar dhe përmirësimi i sigurisë publike mbeten prioritet kryesor dhe goditjet e forta kundër grupeve kriminale vijojnë të intensifikohen çdo ditë.

Hetime komplekse në bashkëpunim me SPAK apo prokuroritë e jursidiksionit të përgjithshëm në rrethe po çmontojnë grupe të përfshira në ngjarje të rënda, si vrasje, apo trafiqe e pastrime parash.
Falë vendimit të Gjykatës Evropiane për të Drejtat e Njeriut, edhe hetimi i vrasjeve të 21 Janarit është një detyrë prioritare për policinë dhe prokurorinë. Ka një rënie drastike të numrit të vrasjeve kriminale gjatë këtij viti, 32 deri më tani 2023 krahasuar me 42 në vitin 2022 dhe me 124 në vitin 2012. Duke e bërë vitin 2023 si një vit historik për rendin dhe sigurinë.

Këtu nuk duhet lënë pa përmendur edhe rritja e zbulueshmërisë dhe forcës parandaluese. Indeksi Evropian mbi Kriminalitetin dhe Sigurinë Publike e përcakton tashmë Shqipërinë si një vend me indikator sigurie më të lartë sesa fqinjë tanët të cilët janë anëtarë të Bashkimit Evropian. Vetëm në 20 javët e fundit, Policia e Shtetit ka realizuar 13 Operacione Kombëtare dhe 490 operacione policore lokale, me 3549 persona të ndaluar.
Lufta kundër fenomenit shqetësues të përdorimit të lëndëve narkotike po garanton çdo ditë shkolla dhe komunitete më të sigurta.

Deri në këtë moment falë Operacionit Kombëtar “TEMPULLI” janë goditur 24 grupe kriminale
dhe janë vendosur para drejtësisë 495 shtetas, prodhues, shpërndarës dhe trafikantë të lëndëve narkotike.
Operacioni Kombëtar “SUNDIMI I LIGJIT” po jep gjithashtu rezultate të kënaqshme duke çuar para drejtësisë 302 shtetas, të shpallur në kërkim ndërkombëtar ose kombëtar, grupe kriminale të përfshira në organizim të paligjshëm të lojërave të fatit, për armëmbajtje pa leje, për mashtrim, kontrabandë dhe krime të tjera ekonomike.

Në vijim të pastrimit të alpeve dhe zonave të tjera në të gjithë territorin, janë asgjësuar 180 371 bimë narkotike cannabis sativa, me 148 shtetas të ndaluar dhe vendosur nën akuzë. Janë parandaluar nga Policia e Shtetit 45 ngjarje kriminale dhe kjo duhet të sfida e re e punës së përditshme të policisë.

I kam kërkuar drejtorive vendore të policisë dorë të hekurt kundër dhunës më bazë gjinore dhe mbrojtje e mbështetje për viktimat e dhunës.

Policia e Shtetit po fiton një besim më të madh jo vetëm nga publiku por dhe nga agjencitë e vendeve partnere.

Qytetarët janë jo vetem arsyeja pse ekziston Policia, po janë edhe partnerët tanë të pazëvendësueshëm në mbrojtjen e vendit dhe të çdo individi, nga çdo lloj paligjshmërie, që nga krimi i organizuar, tek krimi ordiner dhe deri tek krimi ndaj pronës publike e private.
Rëndësia e detyrës që mbart uniforma e Policisë së Shtetit, duhet ta bëjnë shoqërinë të reflektojë për ridimensionimin e qëndrimeve dhe mbështetjes për sigurinë publike, garantuesi themelor i së cilës është Policia e Shtetit.

Kush nuk është dakord me urdhërin apo vendimin e punonjësit të policisë të marrë avokatin, por në rrugën tonë “të të bërit shtet”, na duhet të vendosim një standard të ri në autoritetin e punonjësit të Policisë së Shtetit.

As Ligji, as publiku nuk mund të pranojnë më shtyrje, fyerje, kërcënime, kanosje, dhunë dhe rrezikim të jetës së punonjësve të Policisë së Shtetit dhe të Gardës së Republikës, duhet vendosur një standard të ri ndaj kujtdo që ngre dorë kundër Shtetit.

Një politikë/praktikë e re penale të zërë vend në këtë drejtim, duke kërkuar mbështetjen e sistemit të drejtësisë. Kuadri ligjor është aty në Kodin Penal dhe do të përforcohen në Kodin e ri Penal, si dhe në ligjin për Policinë Shtetit.

Rritja e standardit të jetesës dhe përmirësimi i kushteve të shërbimit të çdo punonjësi policie si dhe të Gardës së Republikës, që nga kushtet financiare deri tek kushtet e strehimit kur shërbejnë jashtë vendbanimit apo krijojnë familje të reja.

Prandaj falë mbështetjes së Kryeministrit, e bëmë fakt dhe kemi tashmë 92 punonjës policie të cilët janë shpallur përfitues dhe do të hynë më në fund banesën e tyre.

Shpresoj të kemi të paktën 300 banesa të tjera gjatë 2024 dhe 500 të tjera një vit më pas, të cilat do t’u jepen familjeve të reja të punonjësve të policisë së shtetit.

Buxheti 2024, që miratuam dje në Kuvend, do të na japë mundësinë të bëjmë një rritje të konsiderueshme të pagave në Policinë e Shtetit dhe gjatë vitit tjetër t’i japim një zgjidhje përfundimtare pagesës së munguar të ushqimit për çdo punonjës policie.

Rritja e performancës së Policisë së Shtetit lidhet në mënyrë të pandashme me procesin e vetëpastrimit,
e cila tashmë ka hyrë në një fazë të re,
për të çrrënjosur një herë e përgjithmonë nga trupa e shëndoshë e policisë së shtetit elementët e dëmshëm të inkriminuar apo shkelës së etikës,
të cilët njollosin punën e palodhur të mijëra e mijëra uniformave blu që shërbejnë me vendosmëri të palëkundur shtetit të së drejtës dhe në mbrojtje të qytetarëve të këtij vendi.

Hetimet në bashkëpunim me SPAK, prokuroritë e jurisdiksionit të përgjithshëm, SHISH dhe agjenci të tjera për punonjës të nivelit të parë drejtues apo zbatues, të dyshuar për shpërdorim detyre, korrupsion, vepra penale në fushën e narkotikëve, veprime arbitrare, lidhje/komunikime me krimin si dhe çdo veprim tjetër të paligjshëm vijojnë dhe rezultatet e këtij procesi janë domethënëse:
323 punonjës policie të arrestuar/proceduar deri më tani.

Këto operacione dhe këto rezultate janë vetëm fillimi i vendosmërisë tonë për të vijuar me vetë-pastrimin e radhëve të Policisë së Shtetit nga ata elementë të cilët e dëmtojnë atë.

Ky proces i cili sapo ka hyrë në një fazë të re do t’i japë Shqipërisë dhe shqiptarëve një Polici më të fortë dhe një nivel akoma më të lartë të sundimit të ligjit.

E sotmja nuk ka krahasim me të shkuarën dhe ditë pas dite rikthimi i besimit tek Policia e Shtetit po avancon në mënyrë të dukshme dhe të padiskutueshme.

Por e ardhmja nuk do të ketë krahasim me të sotmen dhe unë kam nderin e madh, besimin e Kryeministrit, të shumicës së Kuvendit dhe shpresoj të shumicës së shqiptarëve për të vazhduar ndërtimin e besimit të duhur tek Policia e Shtetit edhe më shpejt, duke përmirësuar çdo gjë, në çdo drejtim.

Vetëm përpara.

Do të forcojmë me ligj Paketën Sigurisë në Shkolla duke bërë të mundur ashpërsimin e dënimeve të parashikuara në Kodin Penal për veprat penale që kryhen në mjediset e një institucioni arsimor apo në perimetrin e sigurisë së tij. Kryerja e një vepre penale në mjediset e një institucioni arsimor ose në perimetrin e sigurisë së tij të parashikohet si rrethanë rënduese, nëse në dëm të një të mituri, dhe, në çdo rast, si rrethanë cilësuese e figurës së veprave penale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.