Ministri i Brendshëm në Shqipëri, Taulant Balla kërkoi nga strukturat e Policisë së Shtetit që të parandalojnë çdo ngjarje dhune në kryeqytetin shqiptar gjatë ndeshjes Shqipëri-Poloni.
Lajmi u bë i ditur gjatë një takimit të zyrtarit shqiptar me drejtuesit e Policisë së Shtetit, ku ka diskutuar për planin e masave të sigurisë.
“Kam shumë besim që një koordinim më i mirë i të gjitha strukturave të Policisë së Shtetit, qoftë e rendit, Rrugorja apo dhe strukturat e tjera të Antiterrorit apo Strukturat e Forcave të Ndërhyrjes së Shpejtë, do duhet që të parandalojnë çdo ngjarje dhune në kryeqytetin shqiptar gjatë këtij evenimenti sportiv, shtuar këtu dhe përpara ndeshjes dhe pas ndeshjes. Mos harroni kurrë që gjithçka lidhet me imazhin e Shqipërisë”, deklaroi fillimisht ministri.
Sipas tij, duhet një nivel tjetër sigurie në stadiume, jo vetëm në evenimentet sportive ndërkombëtare, por edhe në garat kombëtare.
Balla theksoi se Policia e Shtetit nuk duhet të lejojë asnjë shfaqje huliganizmi gjatë ndeshjes Shqipëri-Poloni.
“Ndaj kujtdo që shkel rregullat e vendosura nga UEFA, do të dokumentohen shkeljet dhe do të kërkohen ndëshkime të ashpra. Ne nuk duhet të presim të na ndodhi një ngjarje si ajo që ndodhi në Athinë pak javë më parë, për të ashpërsuar masat tona”, pohoi zyrtari shqiptar.
Ministri Balla është shprehur se duhen evidentuar personat me precedent huliganizmi, në të dy tifozeritë si dhe thekson se personat e dhunshëm duhen ndaluar përjetësisht të hyjnë në stadiume.
“Jemi në kohën e duhur për të komunikuar me publikun dhe për të thënë qartë se gjithkush që vjen në stadium, me mendjen për të shkulur stolat e stadiumit dhe për t’i hedhur ato në fushë, apo për të shkaktuar akte të tjera huliganizmi dhe këtu me Federatën Shqiptare të Futbollit duhet të jemi shumë të qartë, për të marrë masa drastike, natyrshëm pjesën penale, por dhe për të mos lejuar përjetësisht persona të caktuar që të hyjnë në stadiume”, shtoi ai.
Zyrtari shqiptar solli në vëmendje Britaninë e Madhe duke e konsideruar si “shembullin më kuptimplotë të ndryshimit drastik”, por dhe Shqipëria nuk ka pse bën përjashtim në këtë, vijoi Balla.
“Kemi kohën e duhur në dispozicion për të evidentuar personat me precedent huliganizmi, në të dy tifozeritë edhe në atë shqiptare edhe në atë polake. Edhe me palën polake duhet të jemi shumë të qartë dhe personat të cilët nga komunikimi me Policinë e Shtetit Polak, na rezultojnë që kanë precedent në ngjarje huliganizmi të mos lejohen fare të hyjnë në stadium edhe nëse posedojnë një biletë të vlefshme, sepse vendimin përfundimtar për të hyrë apo jo në stadium e merr Policia e Shtetit”, ravijëzoi në përmbyllje ministri i Brendshëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
