Bajrami, Muratit: Në vend se ta tregoni gjendjen reale, bëheni instrument për ta manipuluar syrin e militantit

Deputetja e Lidhjes Demokratike të Kosovës, Hykmete Bajrami, i ka reaguar ministrit të Financave, Punës dhe Transfereve Hekuran Muratit, për të dhënat që i ka prezantuar nga raporti preliminar të shpenzimit të buxhetit, sipas të cilit në vitin 2023 shpenzimet janë rritur 13 për qind krahasuar me vitin paraprak.

Bajrami, përmes një shkrimi në rrjetin social ‘Facebook’, ka akuzuar Muratin për manipulime me numrat në formë të përqindjeve, duke thënë se janë bërë për ta “manipuluar syrin e militantit”.

“Për të, interpretimi i shifrave faktike në vend se ta tregojë gjendjen reale bëhet instrument për të manipuluar syrin e militantit, ndërsa realiteti shihet qartë për ata që duan të shohin”.

“Në fakt, kushdo që jeton në Kosovë e din se zhvillimi infrastruktor i shtetit është lënë në harresë nga një qeveri e cila po e përfundon mandatin 4 vjeçar vetëm me përurimin e urës së vogël të Staradranit dhe me ndërtimin e katër çerdheve nga 160 të premtuara”, ka shkruar Bajrami.

Të gjitha shifrat e prezantuar nga Murati, nga këndvështrimi i saj tregojnë për “mospunën e Qeverisë”.

“E çudia më e madhe në shifrat e Hekuranit është kjo: Qeveria Kurti II për nëntë muaj të vitit 2023 ka shpenzuar 263 milionë euro, ndërsa vetëm në tremujorin e fundit janë shpenzuar 294 milionë euro. Si ka mundësi? Nëse duam t’i biem shkurt dhe t’i injorojmë absurditetet si kjo më lart, shifrat me të cilat po mburret Hekuran Murati në fakt vetëm se e tregojnë më se miri mospunën e kësaj qeverie”.

“Mos të harrojmë se jemi me 9 janar 2024, ndërsa qeveria Kurti II e ka marrë mandatin me 22 mars të vitit 2021”.

Ajo ka kërkuar nga ministri që të tregojë se shpenzimet buxhetore janë më të ulëta sesa planifikimi për 342 milionë euro.

“Hekuran Murati paska thënë se shpenzimet buxhetore për vitin 2023 janë rritur me 13% në krahasim me një vit me herët, por do të ishte më fer të tregohej se këto shpenzime, duke e përfshirë edhe lëmoshën e shpërndarë në fund të vitit, arrijnë shumën totale prej 2.966 miliardë euro, apo saktësisht 342 milionë euro me pak se buxheti i planifikuar (3,238 mld euro)”.

Edhe pse nga ministri është thënë se investimet kapitale janë kategoria që ka pasur rritje më së shumti në vitin 2023, sipas Bajramit kjo ka qenë më e ulët sesa ka qenë planifikimi.

“Në vijim, ai paska thënë se shpenzimet kapitale na qenkan rritur për 32% në krahasim me vitin 2022 dhe, nëse kjo është e saktë, i bie që në total janë shpenzuar 557 milionë euro apo 262 milionë euro me pak se buxheti i planifikuar (819 mil.euro)”.

“A e din Hekurani se paaftësia për ta shpenzuar një buxhet të planifikuar nuk është arritje me të cilën mund të mburresh por cilësohet si dështim, mungesë vizioni dhe simptomë e keqmenaxhimit?”, ka shkruar Bajrami.

Ajo ka theksuar se ka pasur kategori të caktuara në të cilat pagat janë ulur e të tilla që pagat nuk u kanë lëvizur nga vitit 2016.

“Shpenzimet për paga dhe shtesa qenkan rritur për 111 milionë euro dhe sipas tij, pagat në sektorin publik qenkan rritur për 17%”.

“Por mesatarja këtu sërish nuk e tregon realitetin sepse derisa Hekuranit i është rritur paga për 450 euro vitin e kaluar, ka kategori të tjera që kanë pasur ulje të pagës, dhe ka të tillë të cilëve paga nuk u ka lëvizur prej vitit 2016. Andaj është mirë që Hekurani ta dijë se kur ai han dardha nuk do të thotë se të tjerëve ju pihen dhëmbët”.

Sa i përket subvencioneve dhe transfereve, deputetja tha se shifrat për këtë kategori tregojnë diçka tjetër.

“E si qershi mbi tortë, Hekurani paska provuar me krenari të na tregojë se subvencionet dhe transferet në vitin 2023 janë rritur për vetëm 1%, por shuma absolute na tregon diçka tjetër. Derisa ne vitin 2022 kjo qeveri ka shpenzuar 1 milardë e 65 milionë Euro për subvencione dhe transfere, apo 40% të totalit buxhetor, këtë vit për subvencione dhe transfere paskan shpenzuar 1 miliard e 75 milionë Euro, apo 36% të buxhetit”.

“E vlefshme për tu theksuar se në të njëjtën kohë që kjo qeveri shpenzon gati gjysmën e buxhetit në subvencione, varfëria në vendin tonë është në rritje sipas UNDP-së. Me të vërtetë arritje për t’u krenuar”.

Të martën, ministri i Financave ka prezantuar një grafikë që sipas tij tregon për shpenzimet e buxhetit, në vitin 2023 duke thënë se shpenzimet janë rritur për 13% krahasuar me vitin paraprak.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.