Bajrami demanton Krasniqin: Grantin e performancës as nuk e gjetët të anuluar e as me kredibiltet të dëmtuar

Pas një deklarate të cilën e shkroi ministri i Administrimit të Pushtetit Lokal, Elbert Krasniqi, të martën ku tha se grantin e performancës komunale e gjetën të anuluar dhe e rikthyem sërish, ka reaguar deputetja e Lidhjes Demokratike të Kosovës (LDK), Hykmete Bajrami e cila ka thënë se Krasniqi nuk e ka gjetur këtë grant të anuluar.

Përmes një shkrimi në rrjetin social ‘Facebook’, Bajrami ka listuar disa nga faktet lidhur me grantin e performancës për komunat.

“Sistemi i performancës komunale ishte iniciative e Ministrisë së Administrimit të Pushtetit Lokal, MAPL-së në vitin 2008, kur MAPL udhëhiqej nga  ministri i LDK-së  Sadri Ferati. Iniciativa e tillë në atë kohë u mbështet nga projekti i USAID DEMI”.

“Granti i bazuar në performancë komunale, u krijua me iniciativën e MAPL-së për të bashkuar fondet e MAPL-së dhe të Agjencisë Zvicerane për Zhvillim, SDC përmes projektit DEMOS”, ka shkruar fillimisht Bajrami.

Ajo tutje ka thënë se vendimi për fondet e këtij dikasteri ishte marrë në 2017 në kohën e qeverisë së ish kryeministrit Isa Mustafa.

“Ajo marrëveshje ka validitet deri vitin tjetër (ku sipas disa informatave nga SDC nuk do të këtë një fazë të re të përkrahjes me fonde për këtë grant)”.

“Granti i performancës i cili ishte anuluar nga Ministri Rakiq në vitin 2020, ishte vendosur në projekt-buxhet të vitit 2021 nga Qeveria Hoti, në mbledhjen e qeverisë ku MAPL përfaqësohej nga zv.ministrja Fatbardha Emini, dmth”.

“5 muaj para se t’i ta merrje detyrën si ministër i MAPL-së në Qeverinë Kurti II. Dmth. granti i performancës vetëm se ishte përfshirë ne draft-ligjin për buxhetin vjetor 2021, i cili me pas ishte miratuar nga Parlamenti dhe është bërë pjesë e Ligjit të buxhetit ende pa ardhur ju në qeveri”.

“Po ashtu edhe programimi i IPA-së ishte realizuar pas një komunikim konsistent ndërmjet Zyrës së BE-së dhe MAPL-së të mbështetur nga SDC-DEMOS gjatë vitit 2020”.

Ajo tutje ka kërkuar nga ministri që të angazhohet në punë dhe jo duke fajësuar të tjerët.

“Dhe në fund, ministër shumë më mirë do të ishte për ty dhe për vendin që të fokusoheni me shumë në punë e më pak në baltosjën e çdo pune të mirë që kanë bërë plotë profesionistë/shërbyes civil e qeveritarë në të kaluarën”.

Krasniqi, të martën deklaroi se në secilën fushë kanë ndërmarrë masa konkrete për të fuqizuar projektin dhe për të ndërtuar një sistem të qëndrueshëm dhe transparent.

Por, që sipas tij gara në mes komunave s’është vetëm procedurale por përmbajtërsore.

Në shkrimin e tij ministri kishte radhitur hapat që ka ndërmarrë dhe disa procese të cilat janë duke vazhduar për grantin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.