Lajme

Babai sulmon vrasësin e djalit gjatë seancës gjyqësore


Babai i një viktime të vrasjes po përballet me akuza pasi goditi me grusht vrasësin e djalit të tij në gjykatën e qarkut Orangeburg.

Lindy Lamont Jones, 22 vjeç, nga Mars Circle, Orangeburg, javën e kaluar u deklarua fajtor për vrasjen e 18-vjeçarit Willie Antoine Fields, më 2 gusht 2019.

Babai i adoleshentit të vrarë, Willie Clay Fields, po përballet me akuzën për shpërfillje të gjykatës dhe sulm të shkallës së tretë.

Ngjarja ndodhi pas fillimit të seancës dëgjimore të Jones përpara gjykatësit të qarkut, Roger Young.

“Si nëna dhe babai i viktimës do të donin t’i drejtoheshin gjykatësit: Willie Fields dhe Angela Fields”, tha zëvendës avokati i qarkut Tommy Scott për Young.

“Çfarë do të dëshironit të më thoni?”, pyeti Young prindërit e adoleshentit të vrarë.

“Zotëri, thjesht dua t’ju bëj të ditur se çfarë morën nga unë”, tha Angela Fields, duke luftuar me ngashërime dhe lot.

“Më morën fëmijën e vetëm”, tha Angela Fields, me fjalët e saj të shoqëruara me emocione.

“Ka qenë shumë e vështirë”, tha ajo.

Willie Clay Fields, babai i viktimës

Në atë moment, Willie Clay Fields u hodh me shpejtësi nga ana e majtë e gruas së tij, bëri tre hapa të shpejtë dhe goditi me grusht Jones-in.

Jones po qëndronte pranë avokatit të caktuar nga shteti, Jason Turnblad.

Në atë moment, vrasësi i 18-vjeçarit ishte i prangosur dhe prangat metalike në secilën këmbë ishin të lidhura me një zinxhir të shkurtër që lejonte lëvizje të kufizuar.

Në momentin e sulmit, Jones po shikonte poshtë, i veshur me një maskë për fytyrën.

Vrasësi ra në dysheme dhe Willie Fields u duk se e goditi atë disa herë.

Oficerët dhe policët në sallë nxituan të ndanin të dy personat.

“Largohu, zotëri! Tërhiquni, zotëri!” bërtiti një oficer.

Lindy Lamont Jones, vrasësi i 18-vjeçarit

“Të lutem mos, Willie,” qante Angela Fields, duke u përpjekur të largonte burrin e saj nga vrasësi i djalit të tyre.

Jones u ngrit nga dyshemeja, u ul në tavolinën e mbrojtjes dhe u përpoq t’i afrohej Willie Fields ndërsa bërtiste, “Unë do të të rrah more djalë! Unë do të të rrah”.

Oficerja e burgut e kishte kapur Jones me krahët rreth belit, duke e penguar atë të sulmonte Willie Fields.

Më pas ajo e shoqëroi Jones në zonën e mbajtjes së të burgosurve në gjykatë.

Familjarët e adoleshentit të vrarë u shoqëruan jashtë sallës së gjyqit.

Pas disa minutash, gjykata rifilloi, por jo me seancën e dënimit të Jones.

 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore