Avokati i Muharremit jep detaje për kontaktet e mashtruesit polak me MINT-in

Mahmut Halimi, avokati i afaristit kosovar Ridvan Muharremi, i cili u arrestua së bashku me dy zyrtarë të tjerë të Ministrisë së Industrisë, Ndërmarrësisë dhe Tregtisë (MINT), nën dyshimet për keqpërdorime me rezervat shtetërore, ka dhënë detaje të reja për rolin e klinentit të tij në ndërmjetësimin mes MINT-it dhe një kompanie polake për sigurimin e rezervave shtetërore.

Qeveria e Kosovës i kishte paguar 52 tonë grurë, 120 mijë kilogramë sheqer dhe 200 mijë litra vaj në vlerë prej afër 600 mijë euro një kompanie polake me emrin “Xanto”, por as gruri, as vaji e as sheqeri sot e asaj dite nuk kanë ardhur në Kosovë.

Halimi, avokati i mikut të afërt të kryeministrit të Kosovës, Albin Kurti, ka thënë se klienti i tij e kishte prezantuar ortakun e tij polak (Tomasz Tokarski) me zyrtarë të MINT-it pas kërkesës së Qeverisë së Kosovës dhe që atëherë, nuk është përzier asnjëherë në ndërmjetësimin e blerjes së rezervave shtetërore për të cilën po dyshohet.

Ai ka bërë të ditur se bëhet fjalë për një biznesmen shqiptar me emrin Nezir Idrizi, i cili, sipas avokatit të Muharremit, kishte marrë një lokal me qera nga klienti i tij e i cili merrej me tregti të produkteve ushqimore me shumicë dhe se degën e kompanisë polake “Xanto” në Kosovë e kishte të regjistruar në Agjencinë e Regjistrimit të Bizneseve (ARBK).

“Personi i cili e ka kërkuar objektin me qera është Nezir Idrizi. Ai është bashkëpronar i kompanisë ‘Xanto’ në Poloni. Idrizi ka shpjeguar se me çfarë veprimtarie merret dhe se e kanë regjistruar biznesin në Poloni. Ridvani ka thënë se Neziri e ka të regjistruar edhe në ARBK kompaninë e tij”, ka theksuar avokati Halimi në një paraqitje në televizionin “Dukagjini”.

Ai ka thënë se klienti i tij e ka njoftuar MINT-in se pronari i kompanisë polake, së cilës i është bërë pagesa për rezervat shtetërore, ishte duke qëndruar në një hotel në Prishtinë dhe kishte kërkuar nga organet kompetente të shkojnë në vendin ku po qëndronte e të marrin iformacione se kur do të vjen malli i blerë, porse të njëjtit nuk kishin shprehur interesim për këtë çështje.

Avokati Halimi ndër të tjera ka insistuar se klienti i tij nuk kishte qenë as pjesë e negocimit dhe as e marrëveshjes përfundintare që MINT-i e kishte arritur me kompaninë polake “Xanto”, derisa në krejt mashtrimin polak për grurin, vajin e sheqerin, del të ketë qenë i përfshirë edhe një biznismen tjetër shqiptar.

Ekskluzive: Rozeta Hajdarit ia zhvati afër 600 mijë euro mashtruesi polak Tomasz Tokarski

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.