Avokati i Hajdarit: I propozuam Gjykatës që të jetë grupi i ekspertëve në seancë dhe ta shpjegojë super-ekspertizën

Avokati i ministres së Industrisë, Tregtisë dhe Ndërmarrësisë, Rozeta Hajdari, Shemdi Bunjaku, e ka arsyetuar kërkesën për mbajtjen e seancës pa prani të mediave në seancë gjyqësore.

Ai para gazetarëve ka deklaruar se kjo është duke u bërë për të respektuar Ligjin për mbrojtjen e fëmijëve.

“Sot është mbajtur seanca në Gjykatën për kundërvajtjen lidhur me aksidentin që pretendohet se fëmija është aksidentuar nga ministrja Rozeta Hajdari, e që në Gjykatë propozuam që të mbyllet kjo seancë duke respektuar Ligjin për mbrojtjen e fëmijëve, me qëllim të mbrojtjes së të miturës”.

Bunjaku, tutje ka sqaruar se kanë pranuar ekspertizë për të cilën kanë kërkuar nga Gjykata që të jetë grupi i ekspertëve për ta sqaruar.

“Gjykata e aprovoi kërkesën tonë dhe e mbylli seancën, pastaj filluam dhe në seancë u deklaruam se e kemi pranuar super-ekspertizën për të cilën i propozuam Gjykatës që të jetë grupi i ekspertëve në seancë dhe ta shpjegojë”.

“Mungesë kujdesi dhe frenim me vonesë”.

Kështu të paktën shkruhej në super-ekspertizën për aksidentin, ku ministrja e Industrisë, Rozeta Hajdari, kishte goditur një të mitur me veturë me 10 prill të vitit të kaluar.

Në raport ndër të tjera theksohet se “drejtuesja e automjetit ‘Ford Fiesta’ nuk ka treguar kujdesin e duhur gjatë lëvizjes në kushte të qarkullimit në zona urbane ku kërkesat për lëvizjen të këmbësorëve dhe lëvizjes të tjera të pamotorizuara janë më të mëdha, duke reaguar me vonesë në ndërmarrjen e veprimit të frenimit të vrullshëm me qëllim të evitimit të aksidentit”.

Ndër të tjera super-ekspertiza konstaton se Hajdari po voziste me shpejtësi më të lartë sesa shpejtësia me të cilën do të mund të evitonte aksidentin.

“Drejtuesja e automjetit ‘Ford Fiesta’ për shpejtësinë e lejuar të lëvizjes prej 50 km në orë, me frenim të vrullshëm nuk ka pasur mundësi teknike për evitimin e përplasjes së këmbësores”.

Më 10 prill të vitit të kaluar, ministrja Hajdari, kishte shkaktuar një aksident trafiku në Prishtinë.

Në aksident ishte përfshirë edhe një vajzë. Vajza ishte goditur nga vetura të cilën e drejtonte Hajdari.

Në shpjegimin e saj paksa kontrovers, Hajdari do të arsyetohej se fëmija ishte ajo që e goditi veturën, dhe jo anasjelltas.

“Mungesë kujdesi e frenim me vonesë” – Super-ekspertiza për aksidentin ku Hajdari goditi një fëmijë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.