Kur flasim për udhëtime, të gjithëve na pushton një ndjenjë e bukur, dhe mendja na shkon në shumë vende njëkohësisht. Ka disa persona që guxojnë të sfidojnë kohën e tyre përmes udhëtimeve. E tillë është edhe vajza nga Polonia, e cila ka eksploruar shumë vende të botës.
Nga zyrat e kompanisë prestigjioze në Londër, në aventura nga më të paparashikueshmet në të gjithë botën, Eva zu Beck merr rrugët më të rrezikshme por ato më të bukurat e Shqipërisë.
Para tre vitesh ajo la punën e saj në Londër, në kompaninë e mirënjohur Culture Trip, për të shkuar në Nepal. Mbas tre vitesh, e gjejmë si një prej liderave të botës së udhëtimeve e aventurës, me 2 milionë ndjekës nëpër kanalet e mediave sociale dhe 80 milionë, shikime në videot e saj. E diplomuara nga Universiteti Oxford, Eva tashmë ka vite që udhëton nëpër botë në vendet më të papritura.
E përshkruan veten si “aventuriere dhe YouTuber që udhëton nëpër vende që nuk mund ti gjeni në mediat e njohura të udhëtimeve. Eva e kërkon aventurën, ndonëse në disa raste, si më poshtë, aventura i dhuron më tepër adrenalinë seç mendonte! Së fundmi, ajo ka publikuar videot e saj plot adrenalinë por edhe mikpritje e ngrohtësi nga Shqipëria.
Rruga drejt Nivicës
Udhëtimi i parë tregon rrugën e saj bashkë me guidën drejt fshatit të Nivicës. Ndoshta ata që e kanë vizituar e dinë mirë, por ka shumë njerëz të cilët janë të papërgatitur për një pjesë të rrugës që vërtet teston guximin. Ndonëse Eva edhe kënaqet me këtë aventurë të papritur, ajo pyet veten si të tjerët e përshkojnë këtë rrugë të rrezikshme. Ardi, guida e saj, është shofer profesionist dhe drejton makinën më të përshtatshme për tërrenin (fuoristradë) e, megjithatë, Eva nervozohet dukshëm. Por, si shpeshherë në këto raste, Eva e kupton vlerën e udhëtimit pasi mbërrin në destinacionin e magjishëm të Nivicës. Pamjet e ujëvarës madhështore, qëndrimi dhe ushqimi në bujtinën e Petritit dhe Dushes, dhe ngrohtësia që ajo gjen aty, i japin kuptim gjithçkaje.
Rrugës drejt Peshtanit
Ditën e parë, Eva ecën për 10 kilometra drejt fshatit Hoshtevë duke ndjekur gjurmët e barinjve të zonës, gjurmë të cilat krijojnë rrugë më të shkurtra mespërmes barit drejt fshatit. Gjatë rrugës takon vendas, zbulon bunkerët e fshehur në zonë, dhe arrin të shtëpia e Lirisë, vendase e cila e mirëpret Evën dhe e fton të kalojë natën aty. Aty Eva provon fasulet dhe çajin shqiptar. Ajo habitet nga mikrpitja e Lirisë.
“Jo vetëm më dha për të ngrënë dhe më ftoi të kaloj natën në shtëpinë e saj por edhe më përgatiti krevatin e deri më mbuloi. Jam shumë e prekur.”është shprehur Eva.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
