Lajme

Asociacioni do të duhej të këmbehej me njohjen nga Serbia, thotë ish-presidentja e Zvicrës


Micheline Calmy-Rey dhe Vjosa Osmani

Ish-presidentja e Zvicrës, Micheline Calmy-Rey, ka komentuar zhvillimet e fundit në dialogun e ndërmjetësuar nga Bashkimi Evropian, gjegjësisht pranimin në parim të draft-statutit të Asociacionit të Komunave me Shumicë Serbe nga ana e Qeverisë së Kosovës

Në leximin e saj, ish-ministrja e Punëve të Jashtme të Zvicrës, beson se formimi i Asociacionit do të duhej të këmbehej me njohjen e pavarësisë nga ana e Serbisë.

“Ndërmjetësuesit e BE-së po ndjekin një politikë që, pjesërisht, e mbron Serbinë. Albin Kurtit po i kërkohet që të jep më shumë autonomi komunave serbe. Megjithatë, homologu i kësaj do të duhej të ishte njohja e Kosovës nga Serbia, në çdo rast. Por, presidenti serb thotë se nuk do ta bëjë kurrë këtë. Ky është problemi me Kosovën”, ka thënë ish-presidentja e ish-kryediplomatja e Zvicrës, Calmy-Rey.

Në një intervistë për mediumi zviceran, swissinfo.ch, politikanja zvicerane, ka vlerësuar se lufta në Ukrainë gjegjësisht agresioni rus, ka ritheksuar rëndësinë strategjike të shteteve të Ballkanit Perëndimor.

“Në këtë kontekst, Kosova ka nevojë për njohje nga më shumë vende për të fituar qasje në organizatat ndërkombëtare. Vendi do të donte të ishte anëtar i Bashkimit Evropian dhe të NATO-s”.

I pyetur për anshmërinë e Unionit në raport me dialogun Kosovë – Serbi, ish-presidentja, beson se Zvicra nuk duhet të përpiqet ta zë vendin e BE-së, por ndoshta të dialogojë me Kosovën, duke ndihmuar këtë të fundit për modelet qeverisëse që ndihmojnë bashkëjetesën në mes të shqiptarëve dhe serbëve në Kosovë.

“Kosova ka frikë të bëhet një Bosnje-Hercegovinë e dytë, por Zvicra mund të jetë një alternativë model. Në Zvicër, ne kemi një qeverisje shumë të veçantë që bashkon pakicat e ndryshme – gjuhësore dhe kulturore. Zvicra mund të jetë një model për një sistem që lejon popullsinë serbe dhe shqiptare të bashkëjetojnë në Kosovë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore