Ashtu siç pritej, shtyhet vendimi për gjoba për ata që përdorin dinarin – Kurti njofton veç në anglisht

Në anglisht dhe me një përshkrim të paqartë, kryeministri i Kosovës, Albin Kurti, ka bërë të ditur që nuk do të ketë masa ndëshkuese për ata që nuk e respektojnë vendimin e Bankës Qendrore të Kosovës për ndalimin e dinarit për pagesa.

Me një njoftim të turbullt në platformën “X”, Kurti tregoi se nuk do të ketë asnjë masë ndëshkuese për ata që vazhdojnë të përdorin dinarin, derisa nuk njoftoi as për sa kohë do të jetë kjo fazë “tranzitore” ku përkundër vendimit nuk do ketë ndëshkime.

“Qeveria e Kosovës, brenda kompetencave të veta, nuk do të shqiptojë masa ndëshkuese gjatë periudhës tranzitore dhe thërret edhe shtyllat tjera (institucionale) që të mbajnë të njëjtin qëndrim”, shkroi Kurti.

Në fund të njoftimit të tij, ai tha se janë në proces e sipër të edhe disa informacioneve të tjera, por pa treguar se për çfarë informacione bëhet fjalë, çka vlejnë ato për këtë situatë dhe cka saktësisht ndodhë pasi të sigurohen ato informacione në plotëninë e tyre.

“Po punojmë për informacione më të plota, që do t’i bëjmë të ditura në ditët në vazhdim”, shkroi kryeministri.

Situata është identike me atë të targave ilegale, kur Kosova njëherë pati vendosur të gjobis të gjithë ata që nuk i zëvendësojnë targat, por një ditë para se të futej në fuqi vendimi, Kurti pati dalë po ashtu në “X” e pati lajmëruar se nuk do të ketë gjoba.

Kjo sepse kishte marrë disa informacione që nuk i kishte më herët, edhe atëherë nuk pati treguar se për çfarë informacione bëhet fjalë.

Në anën tjetër, përkundër se mund të vazhdojnë ta përdorin dinarin, serbët e Kosovës kanë dalë në protestë kundër vendimit të BQK-së.

Ata kanë protestuar në Mitrovicë të Veriut me ftesë të pensionistëve serbë, por që protestës i janë bashkuara të gjitha partitë politike serbe të Kosovës.

“Nuk ia jap Kurtit pensionin” – Nis protesta e serbëve në Veri

Për paqartësinë e tij në prezantim të shtyrjes, ka reaguar nënkryetarja e Partisë Demokratike të Kosovës, Vlora Çitaku.

Ajo ka kërkuar nga Kurti të jetë më i qartë, se çfarë konkretisht po dëshiron të tregojë me njoftimin e tij.

“Kryeministër, a po na tregon shkurt e shqip çka ke deshtë me thanë se nuk të kuptuam.

A e ke shtyrë zbatimin e rregullores për valutat e huaja? Apo bëhet fjalë për ndonjë zmbrapsje tjetër? Sinqerisht nuk të kuptova’, ka shkruash, pos tjerash, Çitaku në llogarinë e saj në Facebook.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.