Artisti nigerian që prezanton ndryshe të moshuarit përmes inteligjencës artificiale

Artisti nigerian Malik Afegbua mund të na sfidojë të krijojmë një botë më të mirë reale dhe një botë më elegante për njerëzit e moshuar.

Imazhet e tij duken sikur janë shkrepur në buzë të një piste mode, por këto modele nuk janë njerëz të vërtetë.

Fotografitë janë rezultat i imagjinatës së Afegbua-s duke punuar në lidhje me software-in e inteligjencës artificiale, duke treguar modele me pamje më të vjetër me rroba të bukura.

Ai e dinte se kishte krijuar diçka të veçantë pasi i kishte postuar ato në mediat sociale.

Seria e imazheve, e quajtur Fashion Show For Seniors, ka tërhequr mijëra komente.

Me mbi 100 mijë pëlqime për fotot në mediat sociale, puna e Afegbua-s ka pasur një ndikim të qartë në botën reale. Por mbeten pyetje nëse puna e krijuar nga kompjuteri është një kërcënim për krijimtarinë njerëzore.

Megjithatë, artisti ka një qasje të nuancuar.

Por çfarë e ka bërë këtë të diplomuar në shkollën e biznesit të orientohej drejt një karriere krijuese?

“Dikush më dhuroi një aparat fotografik dhe ja ku jemi sot”, ka treguar ai në një intervistë për median britanike “BBC”.

Ai u bë regjisor dhe tani prodhon reklama, filma dokumentarë dhe ekspozita të realitetit virtual. Gjithashtu përqafoi shfaqjen e inteligjencës artificiale si një forcë e re udhëheqëse në art.

Me shfaqjet e modës, ai pa një mundësi për të sfiduar atë që ai e sheh si margjinalizimin e të moshuarve në shoqëri dhe donte të sfidonte perceptimet rreth plakjes.

“Kurrë nuk kam parë një shfaqje mode për të moshuarit, por ata ekzistojnë, kështu që pse jo?”, ka thënë artisti.

Ai beson se ato imazhe mund t’i bëjnë njerëzit të mendojnë: “Po sikur të fillojmë t’i bëjmë gjërat në këtë mënyrë?”.

Ka pasur disa reagime kundër përdorimit të inteligjencës artificiale në art, përqendruar rreth faktit nëse kompjuterët mund të përsërisin vërtet krijimtarinë njerëzore.

Mirëpo, Afegbua e sheh këtë një mundësi emocionuese për artistët që të evoluojnë.

Software-i në fjalë ose merr fjalë kyçe që sugjerohen nga artisti ose përdor fotot e ngarkuara, për të krijuar një imazh bazuar në atë informacion.

Çka artisti nigerian po bën me punën e tij është të mësojë inteligjencën artificiale të bëhet më kreative dhe, nga ana tjetër, ai bën zbulime të reja.

“Inteligjenca artificiale mëson nga ne dhe mëson nga World Wide Web. Gjithashtu unë përpiqem të mësoj prej saj. Mundohem të mësoj se si të flas me të, si të komunikoj më mirë për të marrë rezultate të sakta prej saj”, ka shpjeguar ai.

Afegbua përdor tre gjenerues të ndryshëm imazhesh për një shumëllojshmëri rezultatesh për të gjetur një pamje të duhur  për modelet e tij.

“Jam një adhurues i modës dhe gjithmonë më pëlqen të eksperimentoj. Doja të përziej modën tradicionale afrikane nigeriane me diçka futuriste, diçka afro-futuriste”, ka dalluar ai.

Është e qartë se Afegbua është një kampion për përdorimin e inteligjencës artificiale në art, por ai pranon se shqetësimet rreth përdorimit të saj mund të jenë të vlefshme.

Kohët e fundit ka pasur ankesa se vepra origjinale e artistëve është duke u përdorur si material burimor, i cili më pas manipulohet.

Kjo nuk është metoda e Afegbua-s, por ai e di që inteligjenca artificiale mund të përdoret edhe kështu.

“Ka shumë çështje etike për sa i përket vjedhjes së punës së njerëzve të tjerë për të krijuar gjëra të ndryshme. Është një mjet dhe çdo mjet mund të përdoret në një mënyrë jo-etike”, ka sqaruar artisti.

Megjithatë, Afegbua është optimist kur bëhet fjalë për përdorimin e teknologjisë në art.

“Mendoj se do të përmirësohet sepse algoritmet vazhdojnë të përmirësohen. Motorët vazhdojnë të përmirësohen”, ka thënë ai.

Të gjitha imazhet, e drejta e autorit Malik Afegbua.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.