Policia ruse ka arrestuar një grua të dyshuar për dorëzimin e një bombe që vrau një bloger të njohur ushtarak rus pro luftës.

Shpërthimi u regjistrua të dielën e 2 marsit në një kafene në qendër të Shën Petersburg-ut.

Autoritetet ruse thonë se Vladlen Tatarsky, emri i vërtetë i të cilit ishte Maxim Fomin, u vra nga një shpërthim bombë ndërsa po mirëpriste një diskutim me komentues të tjerë pro-luftës në një kafene në brigjet e lumit Neva në zemrën historike të Shën Petersburg-ut.

Raportimet ruse të lajmeve thanë se bomba ishte fshehur në një bust të blogerit që e dyshuara ia kishte dhënë atij si dhuratë pak çaste para shpërthimit, i cili gjithashtu plagosi më shumë se 30 njerëz.

Në mediat ruse po qarkullonte një video që dukej se tregonte Tatarsky, me mikrofon në dorë, duke u paraqitur me një statujë të një ushtari me helmetë.

Thuhet se shpërthimi ka ndodhur disa minuta më vonë.

Policia ruse tha se kishte identifikuar një grua të quajtur Darya Trepova si të dyshuar, duke shtuar se ajo u arrestua në një apartament në Shën Petersburg pas një kontrolli të hënën në mëngjes.

Burime në ministrinë e brendshme të vendit thanë për median RBC se sulmi ishte “planifikuar me kujdes paraprakisht nga disa persona”.

Tatarsky, i cili kishte më shumë se 560 mijë ndjekës në Telegram, ishte një nga blogerët ushtarakë më me ndikim të vendit.

Ai u shfaq si një nga kritikët më të zëshëm të ministrisë ruse të mbrojtjes gjatë vitit të kaluar për paaftësinë e saj për të arritur përfitime ushtarake në Ukrainë dhe shpesh udhëtoi me trupat ruse në vijën e frontit.

Në një rast ai bëri thirrje për një gjykatë për udhëheqjen ushtarake ruse, duke i përshkruar oficerët më të lartë të Moskës si “idiotë të patrajnuar”.

Ai ishte gjithashtu ndër të pranishmit në një ceremoni të Kremlinit shtatorin e kaluar, ku Vladimir Putin shpalli aneksimin nga Rusia të katër rajoneve pjesërisht të okupuara të Ukrainës, një veprim i dënuar gjerësisht nga komuniteti ndërkombëtar.

Zëdhënësja e Ministrisë së Jashtme ruse, Maria Zakharova, duket se fajësoi Ukrainën, duke thënë se aktivitetet e Tatarsky-it “i kanë fituar atij urrejtjen e regjimit të Kievit” dhe se ai dhe blogerët e tjerë ushtarakë rusë ishin përballur prej kohësh me kërcënime ukrainase.

Por kreu i grupit paraushtarak Wagner, Yevgeny Prigozhin, tha në një mesazh audio se ai “nuk do të fajësonte regjimin e Kievit” për këtë.

“Unë mendoj se është puna e një grupi radikalësh që nuk janë të lidhur me një qeveri”, tha ai në një deklaratë.

Prigozhin shtoi se kafeneja ku ndodhi ngjarja i përkiste më parë atij.

Një zyrtar i lartë i qeverisë ukrainase tha se shpërthimi që vrau Tatarsky ishte pjesë e një lufte të brendshme.

“Merimangat po hanë njëra-tjetrën në një kavanoz”, shkroi në Twitter këshilltari presidencial i Ukrainës, Mykhailo Podolyak. “Ishte çështje kohe kur terrorizmi i brendshëm do të bëhej instrument i luftës së brendshme politike”.

Vdekja e Tatarsky-it është vrasja e dytë në territorin rus të një figure të shquar pro luftës.

Gushtin e kaluar, Darya Dugina, e bija e një ideologu ultra-nacionalist rus, u vra kur një bombë shpërtheu Toyota Land Cruiser që ajo po ngiste.

Rusia ka akuzuar shërbimet e inteligjencës së Ukrainës për kryerjen e vrasjes, por Ukraina mohon përfshirjen.