Arrestohen shtatë persona nga aksioni policor në shtatë lokacione

Policia e Kosovës, ka zhvilluar një aksion në shtatë lokacione të ndryshme në Kosovë, me urdhër të Prokurorisë Speciale, nga i cili janë arrestuar shtatë persona të dyshuar për vepra të ndryshme penal.

Nga Prokuroria, është thënë se gjatë aksionit janë sekuestruar vetura, armë, municion dhe mjete materiale.

“Janë arrestuar shtatë (7) persona të dyshuar për vepra të ndryshme penale. Prokuroria Speciale dhe Policia e Kosovës, njoftojnë opinionin se gjatë këtij aksioni janë sekuestruar disa vetura, armë, municion, mjete të konsiderueshme materiale, si dhe prova të tjera materiale të cilat dyshohen se janë përdorur për kryerjen e veprave penale”.

Nga Prokuroria, janë theksuar edhe veprat penale për të cilat dyshohen të arrestuarit.

“Aksioni është zhvilluar në shtatë (7) lokacione të ndryshme me dyshimin se personat e ndaluar janë përfshirë në kryerjen e veprave penale, ‘’Hyrje në sistemet kompjuterike’’, ‘’Mashtrimi’’ dhe ‘’Shpëlarje e parave’’”, është thënë nga Prokuroria.

Personat e arrestuar dyshohet se janë përfshirë në vepra penale si “hyrje në sisteme kompjuterike”, “mashtrim” dhe “shpëlarje të parave”.

Edhe më 9 janar, Policia e Kosovës dhe Prokuroria Themelore në Prishtinë, kanë kryer një aksion të përbashkët në disa lokacione në Kosovë, nën dyshimin për kryerje të disa veprave penale.

Më 5 janar po ashtu, Policia e Kosovës kishte zhvilluar një aksion në Banjë të Zveçanit me qëllim verifikimin e terrenit, meqë të enjten, policia pikërisht në vendin ku ndodhi edhe sulmi terrorist, sekuestroi një flamur të shtetit të Serbisë, 34 gëzhoja, një karikator të armës AK-47 dhe 689 fishekë të kalibrave të ndryshëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.