“Armët nga Tuzla” – Strategjia e Serbisë për ta përfshirë edhe Bosnjën në sulmin terrorist në Veri të Kosovës

Analistët politikë nga Bosnja e Hercegovina janë shprehur të habitur me pretendimet e Prokurorisë Speciale të Serbisë se kryekrimineli Millan Radojiçiç – njeri i besuar i presidentit serb Aleksandër Vuçiç –  ka siguruar arsenal armësh nga Tuzlla e Bosnje e Hercegovinës, prej janarit deri në shtator të këtij viti, përmes së cilave më pastaj ka organizuar sulmin terroristë në Banjë të Zveçanit.

Sarajeva zyrtare sipas analistit politik, konsulentit dhe kolumnistit në shumë media të huaja, Jasmin Mujanoviç, duhet të tregohet jashtëzakonisht vigjilent ndaj këtyre raportimeve të shtetit të Serbisë, e cila ka gënjyer ose turbulluar faktet e sulmit terrorist që në orët e para të ngjarjes së 24 shtatorit.

“Mendoj se ka të gjitha arsyet për të qenë jashtëzakonisht e kujdesshëm ndaj këtyre pretendimeve”, thotë Mujanoviç në një prononcim për Albanian Post.

Autoritetet e Kosovës kanë akuzuar drejtpërdrejtë Serbinë se qëndron prapa sulmit terrorist, teksa Radojiçiç ka marrë përgjegjësinë për organizimin.

Ai u arrestua të martën nga autoritetet serbe, mirëpo i njëjti një ditë më pas u lirua nga paraburgimi.

Prokuroria serbe që intervistoi Radojiçiç-in të martën artikuloi dyshimet se ky i fundit “ka siguruar armë, municione dhe mjete shpërthyese me fuqi të madhe shkatërruese nga Tuzlla, në Federatën e Bosnje dhe Hercegovinës, nga janari i vitit 2023 deri më 24 shtator”.

Por, cilat janë gjasat që Serbia në rastin e Manastirit të Banjës po dëshiron ta fajësojë dhe ta tërheqë brenda lojës edhe Bosnje e Hercegovinën?

Për Mujanoviç është paksa i pakuptueshëm fakti se pse grupi terrorist është detyruar të sigurojë armatim nga Tuzla, kur në Serbi funksionojnë disa fabrika që prodhojnë armë dhe pajisje ushtarake.

“Për më tepër, ne tashmë e dimë se këta individë po stërviteshin për sulmin duke përdorur bazat ushtarake serbe, kështu që pse do t’u duhej t’i siguronin armët e tyre nga Tuzla, nga të gjitha vendet e tjera, është paksa e çuditshme, për të thënë të paktën”, shton ai.

Administrata Federale e Policisë së Bosnje e Hercegovinës, të martën tha se do të “ndërmarrë aktivitete në lidhje me verifikimin e pretendimeve të Radojiçiç-it”.

Në anën tjetër ministri i Brendshëm i Federatës së Bosnjës, Ramo Isak, deklaroi se “nuk ka informacion për ndonjë armë në zonën e Tuzllës”, që lidhet me rastin e Radojiçiç-it.

Marrë për bazë faktin se shteti i Bosnjës s’është në dijeni për pretendimet e Prokurorisë serbe, Srecko Latal, redaktori rajonal i Rrjetit të Kërkimeve Ballkanike (BIRN) dhe analisti politik nga Bosnja, thotë në një prononcim të shkurtër për AP se nuk mund t’i komentojë këto raportime para se autoritetet në Sarajevë të thonë fjalën e fundit.

“Unë jam në dijeni të këtyre raportimeve, por nuk mund t’i komentoj ato para se autoritetet në Bosnje të shpjegojnë nëse kjo ishte një tregti e ligjshme apo e paligjshme e armëve”, pohon Latal.

Për pretendimet e shtetit të Serbisë, të mërkurën u deklarua edhe ambasadori i Shteteve të Bashkuara të Amerikës në Kosovë, Jeffrey Hovenier.

I pyetur nëse SHBA-të kanë informacione për raportimet se Radojiçiç i ka siguruar armët nga Tuzlla e Bosnje e Hercegovinës, diplomati amerikan tha se kjo temë aktualisht po konsiderohet “me interes”.

Sipas tij në këtë fazë është e rëndësishme që autoritetet serbe kanë nisur ta analizojnë atë të cilën ai e quajti “zinxhir të ruajtjes së materialit [armëve]”.

“Ka pasur material të prodhuar në Serbi që disi ka arritur si pajisje të armatosura në Banjë. Kjo është diçka që duhet ta kuptojmë dhe të adresohet. Nuk mund t’i vërtetoj pretendimet se këto gjëra kanë ardhur prej Tuzllës, ende duhet bërë punë”, tha ai në një bashkëbisedim me gazetarët këtë të mërkurë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.