Apeli i Posaçëm lë në burg të arrestuarit e operacionit “Metamorfoza”

Gjykata e Posaçme e Apelit për Korrupsionin dhe Krimin e Organizuar (GJKKO) ka lënë në burg pesë të arrestuarit nga mega-operacioni “Metamorfoza”.

Bëhet fjalë për shtetasit Pëllumb Gjoka, Edmond Preka, Ardit Hasanbenga dhe Xhevahir Lita, të cilët kërkonin zbutje të masës.

Gjyqtarja e Apelit të Posaçëm, Saida Dollani sakaq nuk ka pranuar ankimin e ish-drejtuesit të Forcës Operacionale, Oltion Bistri.

Prokuroria e Posaçme kundër Korrupsionit dhe Krimit të Organizuar (SPAK) nisi gjithashtu të mërkurën e 30 gushtit një hetim pasuror ndaj tre prej të arrestuarve: biznesmenin Pëllumb Gjoka, ish-drejtuesin e Forcës Operacionale, Oltion Bistri dhe ish-kryeprokurorin e Kukësit Xhevahir Lita.

Qëllimi i hetimeve ka të bëjë me zbulimin e të ardhurave për të siguruar të mirat materiale dhe nëse kanë apo jo burime të ligjshme.

Hetimi pasuror ndaj tre të arrestuarve po ndiqet nga dy prokurorët Altin Dumani dhe Arben Kraja.

Policia e Shtetit zbuloi më herët detajet zyrtare pas operacionit të nisur mbrëmjen e 26 korrikut në disa qytete të Shqipërisë.

I koduar “Metamorfoza” nga autoritetet, ky operacion u konsiderua prej tyre “me shkallë të lartë vështirësie”.

Në operacion u angazhuan Forcat Speciale RENEA, FNSH, Forca e Posaçme Operacionale, Sektori për Hetimin e Grupeve Kriminale në Drejtorinë për Hetimin e Krimit të Organizuar në Departamentin e Policisë Kriminale, drejtoritë vendore të Policisë Shkodër, Lezhë, Vlorë dhe Tiranë, në drejtimin e SPAK-ut.

Policia ekzekutoi masat e sigurisë “Arrest në burg”, për gjashtë shtetas, ndërsa do të shpallte në kërkim nëntë shtetas të tjerë.

Gjatë operacionit u arrestuan në flagrancë edhe dy shtetas të tjerë, për armëmbajtje pa leje dhe veprime që pengojnë zbulimin e së vërtetës.

Policia gjeti dhe sekuestroi një arsenal armësh, tetë automjete (katër prej tyre të blinduara), maska, paruke dhe sende të tjera të paligjshme që përdoreshin nga pjesëtarët e grupit kriminal.

Pëllumb Gjoka, 49 vjeç, banues në Tiranë, i cili dyshohet për disa vepra penale. Nga “vrasja me paramendim”, kryer në formë të veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale” deri te “sigurimi i kushteve dhe i mjeteve materiale për të kryer vrasje”, kryer në formë të veçantë të bashkëpunimit, atë të grupit të strukturuar kriminal.

Gjoka dyshohet edhe për “korrupsion aktiv të gjyqtarit, prokurorit dhe i funksionarëve të tjerë të drejtësisë”, kryer në bashkëpunim si dhe për “mbajtjen pa leje dhe prodhimin e armëve, armëve shpërthyese dhe municionit”.

Gjithashtu, u arrestua Edmond Preka, 46 vjeç, banues në Velipojë, i dyshuar për disa vepra penale.

Nga “vrasje me paramendim”, kryer në formë të veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale” te “sigurimi i kushteve dhe i mjeteve materiale për të kryer vrasje”.

Ai dyshohet edhe për “mbajtjen pa leje dhe prodhimin e armëve, armëve shpërthyese dhe municionit”, kryer në bashkëpunim në formën e grupit të strukturuar kriminal.

Ish-polici Ardit Hasanbenga, 41 vjeç, banues në Tiranë, është arrestuar gjatë këtij operacioni pasi dyshohet për veprat penale “Sigurimi i kushteve dhe i mjeteve materiale për të kryer vrasje”, kryer në formë të veçantë te bashkëpunimit, atë të grupit të strukturuar kriminal, “Grupi i strukturuar kriminal” dhe “Pjesëmarrja në grup të strukturuar kriminal”.

Ish-shefi i Operacionales, Oltion Bistri, 41 vjeç, banues në Tiranë, u arrestua pas dyshimeve për veprat penale “Shpërdorimi i detyrës” dhe “Zbulimi i akteve ose të dhënave sekrete”.

Ndërsa ish-prokurori i Kukësit Xhevahir Lita, 50 vjeç, u arrestua pasi dyshohet për veprat penale “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”, kryer dy herë dhe “Grup i strukturuar kriminal”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.