Lajme

Apeli e kthen në rigjykim çështjen e Krivaqës dhe Sejdiut


Dardan Krivaqa dhe Arbër Sejdiu.

Gjykata e Apelit e ka kthyer në rigjykim çështjen e Dardan Krivaqës dhe Arbër Sejdiut, të cilët janë dënuar nga shkalla e parë për vrasjen e Marigona Osmanit.

Lajmi është bërë i ditur përmes një komunikate dërguar mediave.

“Kolegji i shkallës së dytë, ka ardhur në përfundim se në këtë çështje penale, aktgjykimi përmban shkelje esenciale nga dispozitat e procedurës penale, pasi që mungojnë arsyet për faktet vendimtare të cilat janë thelbësore për vërtetimin e përgjegjësisë penale të akuzuarve, për çka gjykata e shkallë së dytë ka dhënë udhëzimet konkretet të cilat do të duhet të eliminohen në fazën e rigjykimit, nga gjykata e shkallës se parë”, u tha në njoftim.

Në gusht të vitit të 2023, Krivaça ishte dënuar me burgim të përjetshëm për vrasjen e Osmanit, ndërsa Sejdiu me 15 vjet për ndihmë në vrasjen e rëndë.

Më 11 janar, përfaqësuesi i palës së dëmtuar, avokati Gazmend Rexhepi, para gazetarëve ka deklaruar se kanë kërkuar që të akuzuarit Arbër Sejdiut t’i rritet dënimi në 25 vjet burgim ose në burgim të përjetshëm.

Pas përfundimit të seancës në Gjykatën e Apelit, ai tha se kanë shfaqur pakënaqësi për dënimin e Sejdiut me 15 vjet burgim nga shkalla e parë.

Ndërsa, ka potencuar se edhe Prokuroria Themelore në Ferizaj, ka paraqitur ankesë duke kërkuar që të ndryshohet aktgjykimi dhe ricilësimi i kualifikimit.

Në këtë seancë të mbyllur në janar kishin dëshmuar Dardan Krivaqa dhe Arbër Sejdiu.

Më 4 gusht të 2023-ës, Gjykata Themelore e Ferizajt e ka dënuar me burgim të përjetshëm Dardan Krivaqën për vrasjen e Marigona Osmanit.

Ndërsa ishte liruar nga akuza për dhunim.

Kurse, Arbër Sejdiu ishte dënuar me 15 vite burgim për ndihmë në vrasjen e rëndë në bashkëkryerje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore