Anulohet rritja e çmimit të energjisë në Shqipëri

Kryeministri i Shqipërisë, Edi Rama, deklaroi se nuk do të aplikohet në muajin fasha prej 800 kWh për energjinë elektrike.

Në këtë mënyrë, qeveria shqiptare tërhiqet nga rritja e çmimit të energjisë.

Lajmi u bë i ditur gjatë një video-mesazhi online të kreut të qeverisë.

“Sot kam një lajm pozitiv, më 1 shtator kur vendosëm fashën kërkesa nga KESH-i ishte 17 mijë kWh, kërkesa sot është 11 mijë kWh”, theksoi kryeministri.

Sipas tij, me këtë ulje të ndjeshme ka luajtur rol të rëndësishëm ulja e temperaturave, por edhe qasja e abonentëve familjarë për ta kursyer energjinë.

“Kemi pasur përmirësime në Fierzë aty dhe ku është burimi kryesor i energjisë, si pasojë e reshjeve. Në këto kushte dhe duke parë projeksionet për të lehtësuar barrën faktike mbi të gjitha familjet ne vendosëm që aplikimi i fashës prej 800 kWh të mos aplikohet më 1 tetor”, tha Rama.

Ai kujtoi se nga nesër ishte planifikuar hyrja në fuqi e fashës së konsumit 800 kWh mbi çmimin e mbrojtur nga qeveria për konsumatorët familjarë.

Kjo fashë, shtoi Rama, synonte mbrojtje në vazhdimësi të 96 për qind të familjeve të cilat edhe gjatë dimrit nuk e kalojnë këtë fashë.

Kreu i qeverisë vërejti se kjo është një metodë e ndjekur nga plot vende për të kursyer energjisë në këtë kohë kaq të zymtë dhe për të mos paguar nga taksat e të gjithëve mbrojtjen e çmimit për konsumin e lartë të një pakice.

Kujtojmë që Enti rregullator i Energjisë miratoi më 23 shtator vendosjen e fashës prej 800 kWh.

Gjithashtu në mbledhje u miratua çmimi i ri, prej 42 lekësh që do paguanin familjet që kalonin fashën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.