Anulohen të gjitha fluturimet në aeroportin Charleroi të Brukselit për shkak të grevës së papritur

Të gjitha fluturimet në aeroportin Charleroi të Brukselit Jugor u anuluan të enjten për shkak të një greve të papritur që preku rreth 200 fluturime dhe 30 mijë pasagjerë.

Menaxhmenti i aeroportit tha se ishte “shumë i befasuar që ky veprim po ndodh”, pasi sindikatat lëshuan një njoftim veprimi më 4 shtator duke bërë thirrje për një grevë të mundshme “nga 19 shtatori”.

“Është për të ardhur keq që pasagjerët po mbahen peng nga këto veprime”, tha Nathalie Pierard, zëdhënësja e aeroportit.

Mosmarrëveshja ka të bëjë me kushtet e punës dhe përfaqësuesit e sindikatave u ankuan gjithashtu për një “politikë agresive të menaxhimit”.

Orari i fluturimeve të aeroportit tregon se dy fluturime u devijuan në aeroportin e Lièges, ndërsa të tjerët u anuluan.

Aeroporti Charleroi, i vendosur rreth 60 kilometra në jug të Brukselit, përdoret kryesisht nga linjat ajrore me kosto të ulët Ryanair dhe Wizz Air, me një numër të vogël fluturimesh të operuara nga Air Corsica dhe Pegasus.

Me afro 9.4 milionë pasagjerë në vitin 2023, është aeroporti i dytë më i ngarkuar në Belgjikë pas Aeroportit të Brukselit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.