Ambasadori gjerman: Deputetët të përmbushin përgjegjësitë demokratike

Ambasadori i Gjermanisë në Kosovë, Jorn Rohde ka reaguar rreth dështimit të mbledhjeve të Kryesisë së Kuvendit në mungesë të kuorumit.

“E rëndësishme që Kuvendi dhe të gjithë deputetët të përmbushin përgjegjësinë e tyre demokratike”, ka shkruar Rohde në Twitter.

Ai ka thënë se partitë politike duhet të kenë një qasje konstruktive për mbledhjet e Kryesisë.

“Të shpresojmë për një qasje konstruktive nga të gjitha partitë politike për mbledhjet e Kryesisë së Kuvendit dhe arritjen e kuorumit sa më shpejt”.

Important that the Parliament and all MPs live up to their democratic responsibility. Hoping for a constructive approach by all political parties for convening the Assembly Presidency and achieving the quorum soon

— Ambassador Jörn Rohde (@GermanAmbKOS) December 2, 2021

Më 30 nëntor, në mungesë të kuorumit, për të gjashtën herë me radhë, mbledhja e Kryesisë së Kuvendit ka dështuar sërish.

Sipas Shefit të Grupit Parlamentar të Aleancës për Ardhmërinë e Kosovës, Besnik Tahiri, njëri nga anëtarët e mbledhjes së Kryesisë në moment të fundit ka anuluar pjesëmarrjen.

“Ajo që e di nga Kryetari i Kuvendit, Glauk Konjufca, është se nuk ka kuorum. Për ne është e papranueshme që kryesia të jetë kaq shumë jo funksionale”.

Edhe më 26 nëntor, ka dështuar përzgjedhja e nëntë anëtarëve të Bordit të Radiotelevizionit të Kosovës (RTK).

Kryetar i Kuvendit, Glauk Konjufca, deklaroi se në Kuvend janë vetëm 57 deputetë, duke mos u mundësuar krijimi i kuorumit të nevojshëm.

“Unë konstatoj se ky bojkot i një pjese të deputetëve është i qëllimshëm. Nuk ka kushte për t’u votuar Bord i RTK-së prandaj mendoj se duhet ta shtyjmë për një mbledhje tjetër”, deklaroi Konjufca.

Deputeti nga radhët e Lidhjes Demokratike të Kosovës (LDK) si dhe anëtar në komisionin e ad-hoc, Armend Zemaj, kishte propozuar emrat për bordin e ri të Radio Televzionit të Kosovës (RTK).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.