Ambasada e Republikës së Kosovës në Shkup, nëpërmjet një komunikate për media, ka kërkuar që incidenti me presidenten e Kosovës, Vjosa Osmani, në Aeroportin Ndërkombëtar të Shkupit të mos përdoret për politika të brendshme nga akterë të ndryshëm në Maqedoninë e Veriut.
“Ambasada bën thirrje që të mos keqpërdoret emri i saj dhe mos të shfrytëzohet incidenti i paprecedent dhe i paligjshëm ndaj Presidentës së Republikës së Kosovës për qëllime të politikës së brendshme në RMV”, thuhet në reagimin e Ambasadës në platformën sociale, X.
Ndër të tjera në reagim Ambasada e Republikës së Kosovës në Maqedoninë e Veriut ka përgënjeshtruar raportimet se është hera e parë që Kosova ka dërguar notë proteste autoriteteve në Shkup.
“Ambasada e Republikës së Kosovës në Shkup përgenjështron në termat më të fuqishëm lajmin në disa portale të RMV se është prononcuar lidhur me incidentin në Aeroportin e Shkupit dhe se kinse ka konfirmuar se kjo është nota e parë dërguar autoriteteve”.
Ministrja e Punëve të Jashtme dhe Diasporës (MPJD), Donika Gërvalla, i ka dërguar notë proteste Maqedonisë së Veriut për incidentin në Aeroportin e Shkupit ku ishte e përfshirë presidentja Vjosa Osmani, të enjten.
“Ministrja Gërvalla ka paraqitur një notë proteste pranë autoriteteve të Maqedonisë së Veriut, duke kërkuar sqarim të menjëhershëm dhe të plotë për këtë incident”, thuhet në komunikatë për media.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
