Alibeaj jashtë, Berisha brenda – PD bojkoton votimin e presidentit

Kryetari i Grupit Parlamentar të Partisë Demokratike, Enkelejd Alibeaj, në një deklaratë për mediat, tha se të shtunën e 4 qershorit – datë e përcaktuar për raundin e katërt për votimin e zgjedhjes së Presidentit të Shqipërisë – nuk do të marrin pjesë në Kuvend.

“Ne jemi futur në këtë proces, duke kërkuar zgjedhjen e një Presidenti mbi palët, zgjedhjen e presidentit të shqiptarëve, qytetarit të parë që duhet të simbolizojë unitetin e popullit”.

Kjo, shtoi Alibeaj, ishte arsyeja që u futën në mënyrë të hapur në këtë proces.

“Duke marrë pjesë e duke përcaktuar rregulla, se si procesi do duhej të ishte i përbashkët, në mënyrë që dhe produkti të ishte i gjithëpranuar dhe të jepte garanci për ushtrimin në mënyrë normale të detyrës së Presidentit”.

Ai theksoi se nesër nuk ka sens që PD-ja të marrë pjesë në procesin e votimit.

Sipas tij, selia blu nuk e bojkotoi proçesin, por propozoi rregulla.

Ndërsa, më herët kryetari i kësaj force politike, Sali Berisha, deklaroi se do të marrin nesër pjesë në Kuvend për të votuar kundër emrit të propozuar nga Partia Socialiste.

“Ne nuk i njohim të drejtë legjitime Ramës për të propozuar Presidentin duke pasur parasysh masakrën, batërdinë e madhe zgjedhore që ai bëri me armatën e patronazhistëve, me përdorimin e të gjitha segmenteve të shtetit, me përdorimin e dumanëve e bandave dhe sasive kolosale të parave të krimit. Rrugëzgjidhja e vetme do të ishte e drejtë një President i propozuar nga opozita”.

Në mbledhjen e Kryesisë të Partisë Socialiste gjatë ditës së sotme, pritet të zgjidhet emri për president, i cili do të dorëzohet nesër në Kuvendin e Shqipërisë për votim.

Çfarë ka ndodhur?

Të hënën e 30 majit u ezaurua edhe raundi i tretë i votimeve për zgjedhjen e Presidentit të Republikës së Shqipërisë.

Kryetarja e Kuvendit të Shqipërisë, Lindita Nikolla, ka bërë të ditur se asnjë kandidaturë nuk ishte paraqitur, prandaj edhe raundi i tretë u përmbyll pa emër.

Komisioni i Ligjeve, një orë përpara nisjes së seancës plenare, miratoi raportin pa asnjë emër kandidat për zgjedhjen e Presidentit të Republikës së Shqipërisë.

Për të tretën herë radhazi, Komisioni u mblodh pa asnjë emër të dorëzuar pranë Kuvendit të Shqipërisë.

Konkretisht, në seancën e posaçme plenare, Komisioni përcolli raportin.

Të dielën e 29 majit ishte dhe afati i fundit për dorëzimin e emrave kandidatë.

Mazhorancë-opozitë

Alibeaj e bojkotoi seancën e posaçme. Asnjë deputet i grupit nuk ndodhej në ulëset e tyre.

Mazhoranca ka paralajmëruar se propozimet e tyre do të vinin vetëm në raundin e katërt dhe të pestë, duke ia lënë kështu tre raundet opozitës.

Pavarësisht se, pas takimeve mes përfaqësuesve të opozitës dhe mazhorancës, u duk si një “dritë jeshile” për propozimin e kandidatëve, çdo gjë u hodh poshtë.

Sakaq, qe parashikuar që katër do të ishin kandidatët e propozuar nga opozita.

Përkatësisht, dy nga Grupi Parlamentar i Partisë Demokratike dhe dy të tjerë nga Grupi Parlamentar i Aleancës për Ndryshim dhe Grupi për Demokraci dhe Integrim.

Ndërkohë, prej këtyre emrave, dy do të zgjidheshin nga socialistët.

Pas kësaj do të krijohej një grup i përbashkët prej gjashtë anëtarësh, në përbërje të së cilit do të ishte nga PD-ja dhe PS-ja.

Nga ky grup do të dilte një kandidat – i propozuar me firma të përbashkëta PD-PS – që do të dërgohej për miratim në Kuvendin e Shqipërisë.

Por mazhoranca nuk ishte dakord me propozimet e opozitës. Kështu palët u gjenden sërish pa asnjë konsensus.

Alibeaj fill pas dështimit të raundit të tretë përpara mediave deklaroi se u humb rasti për të pasur një President mbi palët dhe që të bënte detyrën në lartësinë e duhur.

Sipas Alibeajt, mazhoranca nuk e mbajti fjalën dhe në tre raundet e para opozita mori pjesë e vetme.

“Kushdo të zgjidhet në raundin e katërt apo të pestë, nuk do të jetë President i shqiptarëve, por i njërës palë”, e përmbylli Alibeaj.

Mirëpo, kreu i Grupit Parlamentar të Partisë Socialiste, Taulant Balla, fill pas mbylljes së seancës deklaroi se vendi nuk do të lihet pa President.

“Ne do të dialogojmë me çdokënd që do të ndajë përgjegjësinë për zgjedhjen e presidentit”, shtoi Balla.

Në përmbyllje, kreu i grupit të PS-së ravijëzoi se askush nuk mund ta marrë peng procesin dhe zgjedhjen e presidentit.

Kujtojmë se raundi i parë i votimeve u përmbyll pa asnjë kandidat. Po ashtu, edhe i dyti dhe i treti.

Çfarë parashikohet në Kushtetutë?

Procesi për zgjedhjen e Presidentit kalon në pesë raunde. Në tri raundet e para, ai duhet të zgjidhet me tri të pestat e votave – pra 84 vota.

Kushtetuta parashikon se, nëse në fund të tri raundeve nuk kemi një president konsensual, atëherë Kreu i Shtetit zgjidhet me 71 vota.

Sipas saj, socialistët mund ta zgjedhin vetë presidentin në raundin e katërt.

Shumica e kërkuar është e thjeshtë, 71 vota pro dhe ata i kanë me formatimin e parlamentit.

Presidenca e shtatë në Shqipëri do të përmbyllet më 24 korrik të vitit 2022.

Në krye të shtetit, që prej 2017-ës, është Ilir Meta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.