Albin Kurti nga PPF-ja: Paqja dhe siguria në Evropë po sfidohen nga Rusia dhe Serbia

Kryeministri i Kosovës, Albin Kurti, deklaroi nga punimet e Forumit të Paqes në Paris (PPF) se paqja dhe siguria në Evropë nuk po sfidohen vetëm në lindje nga Rusia, por edhe në juglindje nga Serbia.

Lajmi u bë i ditur gjatë panelit “Seria e përmbledhjeve të reagimit ndaj krizës”.

Sipas Kurtit, ata (Rusia dhe Serbia – ed) nuk ndajnë një kufi, por ndajnë qëllime të përbashkëta për dominim.

“Ata”, shtoi kreu i qeverisë, “i shohin shtetet përmes lenteve të fesë dhe përkatësisë etnike pasi nuk besojnë në shtetet demokratike ku shtetësia bazohet në respektimin e institucioneve të ligjshme”.

Çfarë është Forumi i Paqes në Paris?

I bazuar në idenë se bashkëpunimi ndërkombëtar është çelësi për tejkalimin e sfidave globale dhe sigurimin e paqes së qëndrueshme, misioni i Forumit të Paqes në Paris është të bashkojë të gjithë aktorët në qeverisjen globale.

Kjo duke nisur me kryetarët e shteteve dhe qeverive, organizatat ndërkombëtare, qeveritë lokale, OJQ-të, fondacionet, bizneset, mediat, sindikatat, grupet fetare dhe qytetarët – në mënyrë që çdo vit ata të jenë në gjendje të angazhohen në dialog nën një çati.

Çdo vit që nga viti 2018, Forumi i Paqes ka nxjerrë në pah projektet dhe iniciativat qeverisëse që propozojnë zgjidhje dhe veprime specifike përballë sfidave globale.

Këto zgjidhje karakterizohen nga dimensioni i tyre ndërkombëtar dhe aftësia e tyre për të sjellë ndryshime të qëndrueshme brenda qeverisjes globale.

Forumi inaugurues tërhoqi 65 krerë shtetesh dhe mblodhi liderë nga sektorët qeveritarë dhe të korporatave si dhe nga shoqëria civile – të gjithë të bashkuar në riafirmimin e mesazhit thelbësor.

Ai është tanimë një ngjarje ndërkombëtare vjetore e fokusuar në ringjalljen dhe përmirësimin e qeverisjes globale.

I konceptuar si një përgjigje ndaj rritjes së tensioneve dhe përkeqësimit të sistemit shumëpalësh, Forumi bazohet në një ide të thjeshtë: zgjidhjet bashkëpunuese janë kyçe për trajtimin e problemeve globale dhe për të siguruar paqe të qëndrueshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.