Në një koncert Cantopop në Hong Kong janë lënë të plagosur dy kërcimtarë pasi një ekran masiv mbi skenë ra mbi interpretuesit.
Videot e qarkulluara në mediat sociale kanë shfaqur anëtarët e grupit Mirror, Anson Lo dhe Edan Lui duke performuar me një duzinë kërcimtare në skenë kur një nga disa ekranet LED të varur mbi skenë u rrëzua.
Prej pamjeve, ekrani duket se godet drejtpërdrejt një balerin në kokë dhe në trup, përpara se të përmbyste një interpretues tjetër teksa audienca bërtiste nga tmerri.
Sakaq, pjesa tjetër e interpretuesve në skenë nxituan për të ndihmuar ata që u goditën.
Sipas policisë së atjeshme, raportimi për ngjarjen është marrë në orën 22:36 dhe se dy valltarë janë dërguar në spitalin Queen Elizabeth në gjendje të vetëdijshme.
Kurse mediat lokale kanë raportuar se, nga të dhënat e spitalit, një nga kërcimtarët ishte në “gjendje të rëndë”, ndërsa tjetri ishte në gjendje të qëndrueshme.
Përveç dy interpretuesve që u plagosën në skenë, tre anëtare të tjera të audiencës u raportuan gjithashtu si të plagosura.
Njëra prej tyre është ndjerë keq dhe është dërguar në të njëjtin spital në gjendje të vetëdijshme, ndërsa dy të tjerat ishin në gjendje shoku, por nuk kanë kërkuar trajtim mjekësor.
Rënia e ekranit LED është aksidenti më i fundit në serinë e koncerteve.
Një peticion në internet për çështjet e sigurisë së koncerteve të Mirror u nis po atë natë dhe që atëherë ka mbledhur mbi 13 mijë nënshkrime nga fansat.
Peticioni u ka kërkuar organizatorëve të garantojnë sigurinë për grupin Mirror dhe kërcimtarët e tij, si dhe të përmbahen nga përdorimi i mekanizmave të panevojshëm të skenës ose platformave të ngritura.
Mirror, një grup prej 12 anëtarësh, i cili ka shumë popullaritet në Hong Kong, është vlerësuar me ringjalljen e Cantopop dhe ka grumbulluar dhjetëra mijëra fansa në qytet.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
