Një aktiviste e njohur #MeToo në Kinë është dënuar me pesë vjet burg për “subversion kundër shtetit”.
Sophia Huang Xueqin u dënua të premten, gati 10 muaj pasi ajo doli në gjyq.
Aktivisti Wang Jianbing, i cili doli në gjyq me Huang, u dënua me tre vjet e gjashtë muaj burg.
Huang kishte qenë një nga zërat më të spikatur në hapësirën #MeToo të Kinës, duke raportuar histori novatore për viktimat e abuzimit seksual.
Ajo kishte folur edhe për mizogjininë dhe seksizmin me të cilin përballej në redaksitë kineze.
Autoritetet kineze nuk e kanë bërë të qartë se si u akuzuan të dy. Gjyqi ishte një seancë dëgjimore me dyer të mbyllura.
Por mbështetësit e tyre thonë se u arrestuan sepse organizonin takime dhe forume të rregullta për të rinjtë për të diskutuar çështjet sociale.
Huang kishte qenë rrugës për të marrë një bursë masteri të sponsorizuar nga qeveria e Mbretërisë së Bashkuar në Universitetin e Sussex-it, kur ajo u ndalua në aeroportin e qytetit të Guangzhou në vitin 2021.
Wang, 40 vjeç, ishte me të në atë kohë.
Mbështetësit thonë se të dy kanë duruar muaj të tërë të izolimit gjatë paraburgimit të tyre, i cili zgjati për gati njëmijë ditë.
Gjyqi i tyre filloi vetëm në shtator 2023.
Një hetim i medias britanike BBC në vitin 2022 zbuloi se të dy mbaheshin në izolim, të ndaluar në vende sekrete të njohura si “burgjet e zeza”.
Në vitin 2021, mes bllokimeve të COVID-it dhe zemërimit në rritje të publikut, autoritetet kineze nisën një goditje ndaj disa aktivistëve që punonin në fusha të ndryshme.
“Përpjekjet dhe përkushtimi i tyre ndaj punës, të drejtave të grave dhe shoqërisë civile më të gjerë nuk do të mohohen nga ky gjyq i padrejtë, as shoqëria nuk do të harrojë kontributet e tyre”, ka thënë grupi i fushatës Free Huang Xueqin dhe Wang Jianbing.
“Përkundrazi, ndërsa shtypja vazhdon dhe padrejtësia rritet, më shumë aktivistë si ata do të vazhdojnë të rriten”.
Amnesty International i ka quajtur sakaq dënimet “të qëllimshme dhe krejtësisht të pabaza”.
“Tregojnë se sa e tmerruar është qeveria kineze nga vala e shfaqur e aktivistëve që guxojnë të flasin për të mbrojtur të drejtat e të tjerëve”, ka thënë drejtoresha e Kinës e Amnesty International, Sarah Brooks.
“Aktivizmi #MeToo ka fuqizuar të mbijetuarit e dhunës seksuale në mbarë botën, por në këtë rast, autoritetet kineze kanë kërkuar të bëjnë pikërisht të kundërtën duke e zhdukur atë”.
Është e paqartë nëse koha e vuajtur nga dyshja do të shkojë drejt uljes së dënimit të tyre.
Reagimi i publikut ndaj gjyqit të Huang ka qenë më parë i përzier – me disa online që e dënuan rastin, ndërsa të tjerë kritikë ndaj lëvizjes feministe e mirëpritën atë.
Shumë avokatë për të drejtat gjinore dhe shkaqet sociale në Kinë zgjedhin të mbeten anonimë në internet.
Shpesh janë akuzuar si “agjentë të forcave armiqësore perëndimore” nga media shtetërore dhe nacionalistët në internet.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
