Aksion i madh i Europol-it kundër trafikimit me qenie njerëzore, arrestohen 130 persona

Mbi 130 kriminelë të angazhuar në trafikim me qenie njerëzore janë arrestuar në një aksion të përbashkët policor evropian të mbështetur nga Europol.

Në aksionin policor më shumë se 22 mijë zyrtarë policorë anembanë Evropës u përfshinë dhe identifikuan rrjetin kriminal, ku përveç 130 arrestime, janë identifikuar edhe 60 persona të tjerë të dyshuar.

“Në një aksion të përbashkët të mbështetur nga Europol, oficerët e enteve evropiane të zbatimit të ligjit dhe autoritetet e inspektoratit të punës arrestuan mbi 130 kriminelë dhe identifikuan me sukses rreth 60 të dyshuar të rinj”.

“Ditët e përbashkëta të aksionit kundër trafikimit të qenieve njerëzore u zhvilluan nga data 6 deri më 13 qershor 2022 dhe u koordinuan nga Frontex me pjesëmarrjen e 22 vendeve së bashku me INTERPOL-in”, njoftoi Europol përmes një komunikate për media.

Në total, u identifikuan mbi 130 viktima të mundshme të trafikimit të qenieve njerëzore, më shumë se një duzinë prej tyre të konfirmuar si të mitur. Kontrollet çuan në zbulimin e mbi 220 dokumenteve të falsifikuara.

Aksioni përfshiu kontrollimin e 13 mijë e 500 lokacioneve, 193 mijë veturave, 970 mijë personave, dhe 101 mijë dokumenteve.

Gjatë aksionit, forcat e rendit kontrolluan edhe identitetin e mbi 11 130 të miturve, të cilët mbeten grupi më i cënueshëm i personave të trafikuar dhe të shfrytëzuar.

“Shumë bien viktima të shfrytëzimit seksual, lypjes së detyruar ose llojeve të ndryshme të kriminalitetit të detyruar, duke përfshirë krimet e vogla dhe trafikun e drogës. Ata gjithashtu bëhen viktima të shfrytëzimit të punës dhe skllavërisë shtëpiake”, shpjegoi Europol.

Vendet pjesëmarrëse: Austria, Belgjika, Bullgaria, Qiproja, Gjermania, Greqia, Hungaria, Irlanda, Lituania, Holanda, Polonia, Portugalia, Rumania, Spanja, Suedia si dhe Bosnja dhe Hercegovina, Lihtenshtajni, Mali i Zi, Maqedonia e Veriut, Serbia, Ukraina, dhe Mbretëria së Bashkuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.